Embehesimentu ta fòrsa region pa tuma desishonnan huntu

WILLEMSTAD, 31 di mart 2026 — Latino-Amérika i Karibe ta embehesiendo mas rápido ku nan sistema di salú, provishon di penshun i merkado laboral por sigui. Esei tabata e mensahe kla djárason 25 di mart último durante un reunion regional virtual bou di liderasgo di Konseho Ekonómiko i Sosial (SER) di Kòrsou, ku ta fungi komo vise-sekretario-general pa Latino-Amérika i Karibe dje Asosiashon Internashonal di Konsehonan Ekonómiko i Sosial i Institushonnan Similar (AICESIS).

Pa SER, e reunion a konektá direktamente ku e trayekto aktual di konseho tokante embehesimentu, atenshon pa kuido i provishonnan pa adultonan mayor, i ‘Happy Aging’ atrabes di un perspektiva sosio-ekonómiko. Den e diskushonnan a partisipá representantenan di Repúblika Dominikana, Brasil, Honduras, Méhiko, Perú, Costa Rica, Paraguay i El Salvador.

Un konklushon a kore manera un liña kòrá durante henter e reunion: sin kolaborashon i koperashon regional, e reperkushonnan di embehesimentu, trabou informal kontinuo i e preshon kresiente riba sektor di kuido i penshun lo ta difísil pa manehá. Segun e partisipantenan, e atenshon den e añanan binidero mester enfoká prinsipalmente riba reforma di sistemanan di penshun, fortalesimentu dje ekonomia di kuido i fomentá solidaridat entre generashonnan. No por enfrentá embehesimentu komo un problema di salú aisla, sino komo un reto sosio-ekonómiko ámplio ku ta toka trabou, entrada, finansas públiko i koheshon sosial.

E Organisashon pa Koöperashon Ekonómiko i Desaroyo (OCDE) a splika durante e reunion kon e demanda pa kuido di largo plaso ta kresiendo i pakiko asistentenan den kuido informal i proveedornan di atenshon profesional mester di un apoyo struktural mihó. E Organisashon Internashonal di Trabou (OIT) a enfrentá e impakto di digitalisashon i Inteligensia Artifisial (IA) generativo riba merkado laboral, teniendo na kuenta riesgonan manera instabilidat laboral, pero tambe oportunidat pa alsa produktividat i kresemento inklusivo. E partisipantenan Brasileño tambe a kompartí nan eksperensia riba e tópikonan aki, loke a duna mas peso na e debate: e diferensia entre paisnan ta notabel, pero e desaroyo dje unión entre nan ta konfirmá ku por logra solushonnan sostenibel solamente via desaroyo konhunto di polítika i un diálogo sosial serio.Tampoko por aserká embehesimentu di un manera aisla; esaki ta rekerí un maneho koherente ku ta mira mas aleu ku algu temporal.