Willemstad, 20 di yanüari 2025 – Studiantenan di Haagse Hogeschool ku ta studia e minor ‘Relashonnan den Reino’, a bishitá Konseho Sosial-Ekonómiko (SER) 15 yanüari último den un evento ku a tuma lugá na Boutique Hotel ’t Klooster na Pietermaai. Durante e bishita, nan a haña oportunidat pa siña mas tokante e trabou di SER, su ròl komo órgano di konseho i konsulta na Kòrsou, den Reino Hulandes i internashonalmente. Ademas nan a risibí informashon tokante posibilidatnan di kore stazje ku por kontribuí na nan desaroyo profeshonal.

E evento a kuminsá ku un presentashon detayá di e funshon i posishon sentral di SER den nos estado di derechi. Komo órgano konsehero di di gobièrnu i di Parlamento riba asuntunan sosioekonómiko, tambe e ekipo tékniko di SER ta duna sosten na e plataformanan diálogo laboral den sektor públiko manera Komishon Sentral di Sindikatonan (CCvV) i Konsulta Sentral Organisá pa Asuntunan di Funshonarionan Públiko (CGOA). E presentashon a duna e studiantenan e oportunidat pa siña mas di aserka tokante e proseso di desaroyo di i konsehá riba maneho públiko i e retonan di mantené un ekonomia relativamente chikí den e konteksto di un reino mas grandi.

Un momentu importante durante e bishita tabata e deliberashonnan tokante posibilidatnan di kore stazje ku SER ta ofresé. E studiantenan a siña kon nan por kontribuí den operashonnan diario di SER pa haña eksperensia práktiko ku tin un balor agregá pa nan desaroyo akadémiko i profeshonal.

E format interaktivo di e seshon a yama atenshon. E studiantenan a hasi preguntanan riba tema manera formulashon di maneho sosioekonómiko, kolaborashon sosioekonómiko i e manera ku SER ta kontribuí pa fortalesé lasonan den Reino i internashonalmente. E diskushonnan akí a enfatisá e benefisio mutuo di e kolaborashon entre Haagse Hogeschool i SER di Kòrsou.

E programa formal a sera ku un lùnch informal, unda e studiantenan i e asesornan di SER a hiba diálogonan i interkambionan den un ambiente relahá. Esaki a brinda nan e oportunidat pa interkambiá eksperensianan i fortalesé lasonan di un forma spontáneo.

Esaki ta e di kuater aña konsekutivo ku Haagse Hogeschool ta bishitá SER di Kòrsou. E bishitanan akí a demostrá di reforsá e importansia di atkerí konosementu práktiko dor di hóbennan interesá den materianan sosioekonómiko. E ophetivo di SER no ta pa solamente inspirá talento hubenil pa aportá den su trabounan diario, sino tambe pa kontribuí aktivamente na desaroyá un generashon di profeshonalnan hóben ku por asumí un ròl importante den progreso sosioekonómiko di e isla.

Haagse Hogeschool i SER di Kòrsou ta satisfecho ku e resultado di e enkuentro i a ekspresá nan deseo mutuo  pa kontinuá ku e tradishon útil aki e añanan benidero.