Komunikado di prensa
SER ta diskutí reformanan fiskal huntu ku ekspertonan di impuesto
Willemstad, 28 di yanüari 2025 – Durante un reunión preparatorio ekstraordinario, ku a tuma lugá djabièrne, 24 di yanüari último, Konseho Sosial Ekonómiko (SER) a risibí un splikashon tékniko i fiskal detayá di parti di Direktor di Asuntunan Fiskal, ku a ser akompañá pa un ekipo di ekspertonan di renombre riba tereno di impuesto. E seshon informativo aki a konsentrá su mes riba dos proyekto di lei klave: ‘Impuesto Mínimo 2024’ i e ‘Reforma di Impuestonan 2025’.
E proposishonnan legislativo aki ta respondé direktamente na obligashonnan internashonal i tendensianan ekonómiko emergente. E proyekto di e ordenansa ‘Impuesto Mínimo 2024’ ta diseñá pa implementá normanan di OECD ku ta establesé un impuesto mínimo di 15% pa kompanianan multinashonal, ku e meta pa redusí mutashon di benefisionan fiskal i minimalisá riesgo di eskivá obligashonnan fiskal. Di su parti, e ‘Reforma di Impuestonan 2025’ tin komo ophetivo fortalesé e base fiskal, koregí definisiensianan i limitashonnan den legislashon fiskal aktual i simplifiká regulashonnan, miéntras e ambishon ta pa mehorá i fortalesé imagen di Kòrsou komo un destinashon atraktivo pa invertí.
E reunión a ofresé un espasio pa un análisis profundo di e implikashonnan tékniko di e reformanan akí. E splikashon a asentuá e importansia di un implementashon oportuno, enfatisando ku e medidanan akí no ta solamente di importansia pa protehá ingresonan fiskal, sino tambe pa mantené Kòrsou su kapasidat di kompetí internashonalmente.
SER ta konsiderá ku e proposishonnan legislativo akí ta importante pa futuro sosioekonómiko dje isla. Basá riba e konosementu atkerí durante e splikashon tékniko i analisis propio independiente, SER lo presentá un rekomendashon na Gobièrnu. Ta spera ku e konseho akí lo kontribuí na un desishon balansá ku ta reflehá e interesnan tantu dje komunidat kurasoleño komo di su ekonomia.
