Willemstad, 12 di desèmber 2024 – Durante e konferensia “Fortaleciendo el Diálogo Social en América Latina”, ku a tuma lugá dia 4 i 5 di desèmber na Panama City, Panama, Direktor i Sekretario General di Konseho Sosial Ekonómiko (SER), drs. Raúl Henriquez, a hasi un yamada pa sigui ku prosesonan di institushonalisashon di diálogo sosial den nos region komo un hèrmènt efektivo pa resolvé konfliktonan laboral i redusí desigualdat sosial.

E evento a ser organisá pa e “Escuela Interamericana de Diálogo Social, Tripartismo y Resolución de Conflictos” (EI-DiSTReC) ku aporte di e ofisina regional di Organisashon Internashonal di Trabou (ILO) pa Latinoamérika. Eksperto- i katedrátikonan di diferente paisnan di nos region a asistí. Henriquez, ku a ser invitá spesialmente pa e okashon, a duna di konosé ku pa enfrentá e reto grandi den Latinoamérika, manera desigualdat sosial, konfliktonan laboral, digitalisashon i krísis klimatológiko, un kolaborashon kontinuo entre diferente sektornan ta esensial.

E konferensia a duna oportunidat pa ekspertonan i interlokutornan sosial partisipá na un diálogo habrí i kompartí eksperensia i solushonnan práktiko. Temanan ku a ser abordá a inkluí, entre otro, institushonalisashon di diálogo  sosial, strategianan inovativo i solushonnan tripartit pa resolvé konfliktonan laboral. Henriquez a indiká ku organisashonnan internashonal manera ILO mester duna mas sosten tékniko na e paisnan den nos region.

E konferensia a reafirmá e nesesidat pa fortalesé e relashonnan den Latinoamérika i enfrentá e desafionan sosial i ekonómiko di siglo 21 di un manera uní i inklusivo.