Konseho di SER tokante modifikashon di e Ordenansa di bibienda públiko

Willemstad, 3 di yüli 2024 –  Konseho Sosial Ekonómiko (SER) a emití awe un konseho ekstenso na Parlamento tokante e proyekto di inisiativa di lei pa modifiká e Ordenansa insular tokante atkisishon di propiedat di kasnan públiko na Kòrsou (A.B. 1962 no.13). E konseho aki ta un reakshon riba petishon di miembronan di frakshon di PAR den Parlamento.

E proyekto di inisiativa di lei proponé ta buska pa kambia e ordenansa aktual di manera signifikativo, eliminando e tasa di inflashon anual ku ta oumentá e preis di benta di kasnan popular. E kambio aki ta buska pa krea un ruta mas aseptabel pa hende ku tin ménos rekurso pa por bira doño di nan propio kas, apoyando asina ei ophetivonan mas amplio di hustisia sosial i stabilidat ekonómiko.

E inisiativa di lei a ser presentá konforme artíkulo 77 di Areglo di Estado di Kòrsou, ku ta duna Parlamento e derecho pa proponé proyektonan di lei na Gobièrnu. SER a evaluá e petishon aki kuidadosamente, tumando na konsiderashon aspektonan legal, sosial i ekonómiko pa garantisá un impakto positivo riba komunidat.

Segun e inisiadónan di e proyekto di lei, ser doño di bo propio kas ta kontribuí na stabilidat ekonómiko i ta fortalesé strukturanan sosial, stimulando asina ei rikesa personal i partisipashon komunitario. Tratadonan internashonal, manera e Deklarashon Internashonal di Derechonan Humano i e Ophetivonan di Desaroyo Sostenibel (SDG’s), ta suprayá importansia di bibienda adekuá komo un derecho humano básiko. Segun frakshon di PAR, ta fundamental pa implementá mekanismonan ku ta fomentá benta di kas sin alterá e merkado di bibienda na Kòrsou.

SER a evaluá e proyekto di inisiativa di lei for di un perspektiva sosioekonómiko, analisando posibel benefisio, riesgo i retonan.