E presidensia di Kòrsou di AICESIS enfatisá durante diskurso na e di 112 Konferensia di Trabou

Geneva, 13 di yüni 2024 – Durante e di 112 Konferensia Internashonal di Trabou (ILC) na Ginebra, Suisa, e Sekretario-General di e Asosashon Internashonal di Konsehonan Sosial i Ekonómiko i Institushon Komparabel (AICESIS), Señor Apostolos Xyrafis, a duna atenshon spesial na e presensia di e delegashon di Kòrsou. E Konseho Sosio-Ekonómiko (SER) di Kòrsou ta tene e presidensia di AICESIS for di novèmber aña pasá, un posishon ku ta suprayá e influensia i liderato kresiente di e isla.

Den su diskurso, e Sekretario-general a mustra su apresio profundo pa e Organisashon Internashonal di Trabou (ILO) i a enfatisá e ròl krusial di AICESIS den promové forma institushonal di diálogo sosial, hustisia sosial i stabilidat ekonómiko. “E presidensia di Kòrsou ta marka pouta pa nos organisashon i ta reflehá e dedikashon di nos miembronan na nos mishon kompartí,” asina e Sekretario-general a bisa.

AICESIS, fundá na 1999, ta representá Konsehonan Ekonómiko i Sosial (ESC’s) i institushonnan similar di mas ku 70 pais. E asosashon ta sirbi komo plataforma pa diálogo i koöperashon entre konsehonan di asesoria sosioekonómiko i institushon di diálogo sosial rònt mundu. E koöperashon ku ILO, ku a kuminsá den 2012 i a keda renobá den 2018, a yega na hopi inisiativa kompartí ku ta fortalesé efektividat di konsehonan di asesoria sosial den forma polítika di trabou i polítika sosial. Mas lat e aña aki, lo firma un  akuerdo nobo di koöperashon ku ILO.

Ta mira e presidensia di SER di Kòrsou komo un indikashon di e papel kresiente di paisnan chikí den formashon di polítika mundial. Sekretario-general Xyrafis a enfatisá ku diálogo sosial institushonal ta unu esensial pa gobernashon demokrátiko, integrashon sosial i resilensia ekonómiko. “Den un époka di progreso teknológiko rápido, kambionan demográfiko i problema di medioambiente serio, e nesesidat pa mekanismo di diálogo sosial robusto ta mas urgente ku nunka,” el a indiká.

Prueba empíriko ta demostrá ku paisnan ku bon órganonan di asesoria sosioekonómiko ta demostrá nivel mas haltu di konfiansa sosial, ménos desigualdat di entrada i merkado di trabou mas resiliente. Na Europa, Latino-América i África, e konsehonan aki a kontribuí na negosashon di paktonan sosial i na mehorashon di derecho i kondishon di trabou.

E diskurso a finalisá ku un promesa reformá pa intensifiká e koöperashon ku ILO i dirigí esfuersonan di AICESIS riba kuestionnan emergente, manera digitalisashon, aparishon di inteligensia artifisial, kambio klimátiko i transishon demográfiko. “Huntu nos por usa e poder di diálogo sosial pa konstrukshon di un mundu mas hustu, imparsial i próspero,”  e Sekretario-general Xyrafis a konkluí.

E presensia i ròl aktivo di e delegashon di Kòrsou durante e konferensia akí ta suprayá e kompromiso dediká di e isla pa kontribuí na desaroyo inklusivo i sostenibel na nivel mundial.

Aki por mira un grabashon di e diskurso kompleto di e Secretario-General di AICESIS.