SER na promé fila pa integridat den lugá di trabou ku e buki inovativo ‘Stop e Silensio’

Willemstad, 7 di desèmber 2023 – Konseho Sosial-Ekonómiko (SER) a risibí resientemente e buki ‘Stop het zwijgen’. E obra aki, ku ta enfoká riba stimulá integridat i siguridat den ambiente di trabou, a ser entregá na drs. Raul Henriquez, direktor i sekretario general di SER. Inisiadornan señora Karin Bosman i señor Frank Peters di Report App, a krea ku e buki aki un hèrmènt efektivo i influyente pa mènedjernan.

E entregá di e buki ta sigui un seri di inisiativanan rònt di siguridat sosial, inkluyendo e Masterclass eksitoso di Siguridat Sosial den Diálogo, inisiá pa Afas Curaçao na sèptèmber di e aña aki. E evento aki a ofresé un plataforma pa interkambio di ideanan i eksperensianan tokante e importansia di un lugá di trabou sigur, ku ta konektá direktamente ku e mishon di e buki.

‘Stop het zwijgen’ ta simbolisá un enfoke nobo den maneho di problemátika di lugá di trabou. E ta kombiná e konosementu amplio i eksperensia di Bosman i Peters ku un metodologia klaro i aplikabel. Esaki ta hasi e buki no solamente un refleho di nan ekspertisio, pero tambe un guia práktiko pa krea un ambiente di trabou mihó.

E ròl di SER, komo un órgano di konseho i konsulta den asuntunan sosial i ekonómiko, ta esensial den propagá e mensahe di ‘Stop het zwijgen’. E buki ta sirbi komo un guia pa lidernan ku ta buska un ambiente di trabou transparente i sigur. Ku apoyo di SER, e tema di siguridat sosial den ambiente di trabou ta keda resaltá prominentemente, kontribuyendo na un kambio positivo den kultura di trabou na Kòrsou.

Riba e potrèt di robes pa drechi: Ingrid Zeilstra (Report App), Miloushka Sboui-Racamy, Raul Henriquez, Karin Bosman (Report App) i Sharlyn Curial-Villarreal.