SER ta proponé un kambio di paradigma den su informe anual 2022 

For di PIB pa prosperidat amplio inklusivo 

WILLEMSTAD, 18 di òktober 2023 – Konseho Sosial i Ekonómiko (SER) di Kòrsou awe, djárason, 18 di òktober 2023, a presentá su informe anual 2022 na Konseho di Ministernan.  

Den un tempu kaminda hopi pais i institushonnan ta usa e Produkto Interno Bruto (PDB) komo e indikadó primario di prosperidat, e Informe Anual 2022 di SER ta ofresé un alternativa inovativo den e konteksto spesífiko di Kòrsou. E informe ta pone énfasis riba e nesesidat urgente pa un konsepto di prosperidat mas kompletu i inklusivo ku ta bai mas leu ku solamente parámetronan ekonómiko.  

Segun e prólogo di e informe anual, e konsepto di “prosperidat” mester ser rekalibrá. Mas aleu di ta un indikadó ekonómiko di un dimenshon so, e konsepto mester ser ampliá pa inkluí elementonan manera bienestar sosial, igualdat sosial i durabilidat ambiental. “E vishon aki ta profundamente ankrá den e mandatonan legal i konstitushonal ku ta forma nos kuadro di maneho,” segun e prólogo di e informe anual 2022 di e organismo di konsulta tripartit.  

E diversidat kultural riku i e resistensia sosial di e komunidat di Kòrsou no ta solamente pre kondishonnan; nan ta aspektonan integral di e strategia institushonal di SER. E informenan di konsulta ku ta ser publiká ta wòrdu prepará ku rigides i ta buska akohida demokrátiko na edukashon, kuido médiko i trabou den e konteksto sosial kompliká di Kòrsou.  

Durabilidat ekológiko no ta ser konsiderá un opshon étiko, sino un deber legal inevitabel. Esaki ta e línea ku mester ser enkaminá, konforme tantu Areglo di Estado di Kòrsou komo tratadonan internashonal ku Kòrsou a ratifiká, segun e prólogo.  

Un komponente krusial den e enfoke holístiko aki ta e Konsulta General ku ta atendé ku Asuntunan di Servisio Públiko (Centraal Georganiseerd Overleg in Ambtenarenzaken (CGOA), na Hulandes). E mekanismo aki tei pa garantisá un ambiente di trabou hustu i ta fungi komo un foro pa sinergia institushonal den e panorama atministrativo.  

“Logra un prosperidat inklusivo i amplio, spesialmente den un konteksto di skala chikí i insular manera esun di Kòrsou, ta un esfuerso kompliká pero esensial. Esaki ta rekerí un kolaborashon fuerte entre organisashonnan gubernamental, entidatnan privá, sektor sosial i komunidat en general,” e prólogo di e informe anual ta sigui bisa. E relato ta invitá tur partidonan relevante pa partisipá aktivamente den e mishon kolektivo aki, ku e meta final di kultivá un komunidat di Kòrsou kaminda prosperidat i bienestar ta ser rekonosé i apresiá den nan magnitut kompleto.  

Klek aki pa informe anual kompleto 2022.