ADECK ta splika SER su ambishonnan i plannan pa futuro pa ku sektor di empresanan chikí i mediano

Willemstad, 30 di mei 2023 – Djabièrnè, dia 26 di mei último, Konseho Sosial-Ekonómiko (SER), representá pa su Direktor/Sekretario General i su konseheronan, a risibí hunta di direktiva temporal i e grupo di trabou di Adeck, e asosiashon ku ta sali na interes di empresanan chikí i mediano na Kòrsou. Durante e enkuentro aki e hunta di direktiva temporal a splika su ambishonnan i plannan pa futuro, den kua a enfoká riba e balor i nesesidat di un asosiashon di interes pa empresanan chikí i mediano na Kòrsou.

E enkuentro entre e asesornan di SER i di Adeck a tuma lugá den un ambiente konstruktivo i habrí kaminda ámbos partido a haña oportunidat amplio pa kompartí nan vishonnan i puntonan di bista. E hunta di direktiva temporal di Adeck a enfatisá ku e lo sigui enkaminá un proseso pa fortalesé empresanan chikí i mediano na Kòrsou i a suprayá e importansia di un grupo di interes fuerte i moderno ku ta representá bos di empresarionan chikí i mediano i defendé nan interesnan serka Gobièrnu i serka otro instansianan i órganonan relevante di pais.

SER a demostrá interes grandi den e plannan di Adeck i a rekonosé e papel krusial ku empresanan chikí i mediano tin den ekonomia di e isla. ,,Empresanan mikro, chikí i mediano ta wesu di lomba di nos ekonomia. Por lo tantu nan ta desempeñá un papel vital den kreashon di empleo, fomentá inovashon i kontribuí di e forma ei na un kresementu ekonómiko sostenibel.” Partidonan a akordá ku otro e importansia di un kooperashon estrecho pa por atendé di forma diligente i konstruktivo ku e retonan i oportunidatnan di empresanan chikí i mediano asina ei krea un ambiente empresarial favorabel pa Kòrsou.

Durante e reunion tambe a diskutí riba diferente tema, manera entre otro promoshon di e espíritu empresarial, mehorá akseso di e tipo di empresanan aki na finansiamentu, mehorá kompetitividat i promové sostenibilidat di operashonnan empresarial. Tambe a identifiká medidanan konkreto kon sigui reforsá posishon di empresanan chikí i mediano. Ámbos órgano ta desidido di sigui kontribuí positivamente na desaroyo i adelanto ekonómiko di Kòrsou i na realisashon di un ambiente empresarial favorabel i sano.

Riba potrèt:

Hunta di direktiva temporal i e grupo di trabou di Adeck, huntu ku konseheronan di SER, di robes pa drechi:  Sr. N. Girigoria, Sr. M. George, Sr. J. Magdalena, Sr. G. Kabbara, Sr. G. Magdalena (Presidente), Sr. Raul Henriquez (Direktor / Sekretario General di SER ), Sra. S. Villarreal-Curial, Sra. D. Eustatius-Martis, Sr. M. van Rooij, Sra. B. Perquin, sinta di robes pa drechi.:  Sra. I. Copra i Sra. M. Sboui-Racamy.