SER Kòrsou: próksimo presidente di AICESIS

WILLEMSTAD, 15 di desèmber 2022 – Konseho Sosial-Ekonómiko (SER) di Kòrsou lo presidí e Asosiashon Internashonal di Konsehonan Ekonómiko i Sosial i Institushonnan Similar (AICESIS) pa e periodo 2023-2025. Esaki a ser akordá dor di e konseho di Atministrashon di AICESIS durante su seshon ordinario, ku tuma lugá dia 2 di desèmber último, na Belgrado, kapital di Repúblika di Servia. E reunion di e Konseho di Atministrashon di e asosiashon mundial prestigioso aki a konta ku delegadonan di 14 di su miembronan for di tur kontinente, ku tabata físikamente presente o a partisipá virtualmente o a duna un mandato. Tambe tabata tin opservadornan di paisnan manera Hungria i Perú. Organisashon Internashonal di Trabou (ILO) a asistí den su kapasidat komo konsehero.

Durante e seshon di e Konseho di Atministrashon, SER di Kòrsou, ku tambe ta miembro di e órgano statutario aki, tabata físikamente representá riba nivel tékniko pa e direktor/sekretario general drs. Raul Henriquez i mr. Miloushka Sboui-Racamy, konsehero prinsipal enkargá ku asuntunan internashonal. E konseho a ser informá ku, despues di a konsultá debidamente ku tur konsehonan ekonómiko i sosial di e region di Latino Amérika i di Karibe, ku ta miembronan di AICESIS,  a bai di akuerdo ku postulashon di SER di Kòrsou komo kandidato pa presidensia di AICESIS pa e periodo 2023-2025. Señor Henríquez a lesa e karta ofisial riba esaki i a entreg’é na e Sekretario General di e Asosiashon.

Konforme artíkulo 8, insiso 1, i artíkulo 7, insiso 3, di e Statutonan di AICESIS, e presidensia di e asosiashon ta sirkulá kada dos aña entre e kontinentenan. Aktualmente e presidensia di AICESIS ta den man di e region Asia, Eurasia i Medio Oriente. E kargo aki lo pasa pa e region di Latino Amérika i di Karibe, kaminda SER di Kòrsou efektivamente, den representashon di nos region, lo ser nombrá ofisialmente durante e próksimo Asamblea General di AICESIS, ku ta premirá di tuma lugá na Moscow, dianan 26 i 27 di òktober di 2023.

SER di Kòrsou, for di aña 2017, ta miembro di e Konseho di Atministrashon di AICESIS i ta enkargá tambe ku e visesekretaria di AICESIS pa region di Latino Amérika i di Karibe. Ophetivo prinsipal di e asosiashon, ku ta mantené lasonan di trabou estrecho ku ILO, Komité Sosioekonómiko di Nashonnan Uní (ECOSOC) i Komité Ekonómiko i Sosial di Union Europeo (CESE), ta pa fomentá i promové diálogo i interkambio entre su miembronan i, na nivel mas amplio, fomentá diálogo entre interlokutornan sosial i ekonómiko na mundu. AICESIS, ku tin su sede statutario na Den Haag, Hulanda, ta fomentá kreashon di konsehonan ekonómiko i sosial den estadonan nashonal ku no ta disponé ainda di nan i ta kontribuí, pa medio di interkambio di trabou i organisashon di enkuentronan, na prosperidat i desaroyo ekonómiko di pueblonan, rèspèt mutuo, pas i sosiedatnan sivil demokrátiko konforme prinsipionan di Nashonnan Uní i e Deklarashon Universal di Derechonan Humano i tambe na e prinsipionan i derechinan fundamental di empleo manera ankrá den diferente konvenshonnan i rekomendashonnan di ILO.

AICESIS ta konsistí di mas ku 70 miembro, ku ta konsehonan ekonómiko i sosial i institushonnan similar ku ta liderá diálogo sosial den nan respektivo paisnan. E repartishon den e asosiashon entre e diferente regionnan ta lo siguiente: 18% di miembronan ta konsehonan di Latino Amerika i Karibe; 36% ta konsehonan Europeo; 30% ta konsehonan Afrikano i 16% ta representá e region di Asia/Eurasia i Medio Oriente. E asosiashon tin miembronan ordinario, opservadornan i miembronan asosiá manera organisashonnan i institushonnan internashonal. AICESIS a ser fundá na yüli 1999 na Port Louis, Mauritius. Su sede prinsipal ta na Bruselas, Bèlgika.

Konkretamente e presidensia lo trese kuné pa SER di Kòrsou, ku ta un pais insular chikí den desaroyo den region karibeño, pa un periodo di dos aña, entrante fin di òktober 2023, dirigí i presidí AICESIS i fasilitá kooperashon di e asosiashon ku su miembresia i retnan, fomentando i promoviendo e konsepto di diálogo sosial tripartit institushonalisá pa medio di interkambio di bon práktika, organisashon di reunionnan i eventonan internashonal den estrecho kolaborashon ku su sosionan na nivel mundial i nashonal, ku organisashonnan intergubernamental, ku e organismonan menshoná di Nashonnan Uní i di Union Europeo, organisashonnan nashonal ku ta dirigí diálogo i organisashonnan di sosiedat sivil.