Kònsùl general di Merka ta reuní ku delegashon tékniko di SER

WILLEMSTAD, 13 di desèmber 2022 – Kònsùl general, a la bes hefe di mishon di Merka pa Aruba, Boneiru, Kòrsou, Saba, Sint Eustatius i Sint Maarten, señora Margy Bond a reuní djaluna 12 di desèmber último ku un delegashon tékniko di Konseho Sosial Ekonómiko (SER) di Kòrsou. A interkambiá brevemente riba e aktividatnan internashonal di e órgano konsultivo, inkluso e forma kon SER ta kumpli ku su tareanan statutario denter di e asosiashon mundial di konsehonan ekonómiko i sosial AICESIS i tambe riba aktividatnan di SER den kuadro di e Inisiativa Global Deal ku a ser establesé ku kooperashon di Organisashon di Kooperashon i Desaroyo Ekonómiko (OECD).

Riba petishon di e kònsùl general, señora Bond, a duna un splikashon riba e ròl di SER komo asesor di gobièrnu i di parlamento riba asuntunan sosioekonómiko i kon i di ki forma SER ta influensiá desaroyo di maneho i legislashon sosioekonómiko di pais ku su konsehonan. Señora Bond a demostrá den e kuadro aki interes en partikular pa maneho i legislashon ku tin di aber ku migrantenan riba merkado laboral lokal i kon por oumentá e oportunidatnan pa e grupo aki i pa merkado laboral i kon por redusí e riesgonan. Aki e delegashon tékniko di SER a hasi referensia, entre otro, na resultadonan di e seshon di e mesa rondó stratégiko ku a ser organisá dia 30 di ougùstùs e aña aki dor di e organisashon ku ta sali na defensa di derechonan humano Human Rights Defense i na kua diferente miembro di SER a partisipá. E mesa rondó aki ta ser konsiderá komo un follow up riba inisiativanan anteriormente tumá riba e tema aki, manera e simposio ‘Migrashon i Desaroyo Sosioekonómiko’ ku a wòrdu organisá pa SER na mei di aña 2019.

E reunion ku e delegashon tékniko di SER a oumentá e interes di e kònsùl general di Merka pa e papel di asesoria ku SER tin di poder ehekutivo i poder legislativo. A finalisá e reunion ku e kompromiso ku den futuro lo sigui hiba interkambionan entre e aktornan envolví riba temanan spesífiko ku un karakter sosioekonómiko.