Komunikado
Kòrsou ta haña puesto di sekretario general athunto bek pa Karibe i Latino Amérika di e organisashon mundial di konsehonan sosial ekonómiko i institutonan similar (AICESIS).
SANTO DOMINGO, 7 di sèptèmber 2017 – Durante e Asamblea General di e Asosiashon Internashonal di Konsehonan Sosial Ekonómiko i Institutonan Similar (AICESIS), ku ta tumando lugá aktualmente n’e kapital di Repúblika Dominikana (Santo Domingo) i di kua Konseho Sosial Ekonómiko di Kòrsou (SER) ta miembro, SER Kòrsou a ser elegí unánimamente dor di e asamblea pa e próksimo dos añanan asumí e kargo di AICESIS-Sekretario General athunto, enkargá ku Karibe i Latino Amérika, basá riba artíkulo 12 di e statútonan di e organismo.
E kargo di Sekretario General athunto di AICESIS ta unu responsabel i ta trese kuné ku SER di Kòrsou pa e término menshoná lo traha den estrecho kolaborashon i kooperashon ku e Sekretario General di AICESIS den formulashon di e agènda regional pa e próksimo término pa ku e region Latino Amerikano i Karibense. Den e kuadro aki SER di Kòrsou lo ta responsabel pa koordinashon i komunikashon di tur aktividat atministrativo, logístiko i di maneho di AICESIS pa ku paisnan den nos region.
E representashon di SER di Kòrsou ku aktualmente ta asistí na e Asamblea General a hiba un lobby pisá pa por a atkerí e funshon importante aki bek.
Riba e foto por mira e delegadonan di Kòrsou den kombersashon ku nan koleganan di Brazil, Repúblika Dominikana, Argentina i Mexico.
![7-sept-2017-01-696×463-1](https://b2825881.smushcdn.com/2825881/wp-content/uploads/sites/280/2017/09/7-sept-2017-01-696x463-1.webp?lossy=1&strip=1&webp=1)