Un delegashon tékniko di Konseho Sosial Ekonómiko di Kòrsou (SER), ta asistiendo na algún reunión di komishon di trabou di CDES na Brasilia

Brasilia/Willemstad, 16 di ougùstùs 2018 – Riba invitashon di sr. Luiz Eduardo Rodriguez Alvez, sekretario di e Konseho Ekonómiko i Sosial di Brasil (Conselho de Desenvolvimento Econômico e Social (CDES)), situá na e kapital federal Brasilia, un delegashon tékniko di Konseho Sosial Ekonómiko di Kòrsou (SER), konsistiendo di direktor/sekretario general sr. drs. Raul Henriquez i konsehero hurídiko mayó mr. Miloushka Sboui-Racamy, aktualmente ta asistiendo komo opservadónan internashonal, huntu ku nan koleganan dr. Gerardo Luppi i sr. Gustavo Carrizo di e Consejo Económico y Social de la Ciudad de Buenos Aires, Argentina, na algún reunión di komishonan di trabou di CDES.

E reunionan ta tumando lugá na e fasilidat di e skol nashonal di atministrashon públiko (Escola Nacional de Administraçao Pública, ENAP) na e kapital federal atministrativo di e pais Sud Amerikano di habla Portugues. Despues di e apertura di e promé reunión di e komishon di trabou tokante reforma tributaria (reforma fiskal) e delegashonnan tékniko di e SER-nan di Kòrsou i di Buenos Aires tabatin un enkuentro ku sr. minister Eliseu Padilha, sekretario ehekutivo di CDES i minister prinsipal den e gabinete sivil di e presidente di Republika di Brasil sr. Michel Temer.

Durante e interkambio aki, e representantenan di e tres SER-nan a elaborá riba funshonamentu di nan respektivo organismonan i ki fórmula nan a i ta usando pa sigui alsa nan efektividat. E sekretario ehekutivo di CDES a trese pa dilanti ku durante e último añanan mas gremio- i segmentonan di sosiedat brasileiro (e.o. represe ntantenan di sosiedat Afrobrasileiro, gruponan kultural i tambe mundu akadémiko) a wak e balor agregá di e organismo i konsekuentemente awe ta forma parti integral di dje, kondusiendo asina ei, te na sierto grado, na un komprenshon kresiente pa maneho sosio-ekonómiko di e gobièrnu federal, no opstante e retonan ku e país ta pasando aden aktualmente, e.o. un debe kresiente i un desigualdat sosial eksistente enorme a pesar di e reformanan fiskal ku a introdusí pa yega na un restribushon mas hustu di entrada den e pais.

E representantenan di e konseho di Buenos Aires a enfatisá ku nan ambishon prinsipal ta pa yega na un SER nashonal pa Argentina, mientras ku e delegashon tékniko di SER di Kòrsou a trese pa dilanti, den su kalidat komo sekretario general athunto di AICESIS (e asosiashon internashonal di SER-nan i institushonan similar) pa Latino América i Karibe su deseo ferviente pa sigui duna un impulso real pa logra reaktivá e ret CESALC, den kua konsehonan sosial ekonomiko di región di Karibe i di Latino Amérika tin representashon.

Den e próksimo dianan e delegadonan lo sigui den kombersashon ku otro pa yega na palabrashonan konkreto kon pa sigui kooperá ku otro den e kuadro institushonalisá di AICESIS pa reaktiva CESALC.

Riba e kombinashon di foto: E delegadonan den enkuentro ku otro.