Nota inisial ‘Future of Work’ entregá na minister di SOAW

Willemstad, 22 di yüni 2018 – E Sekretario General di e Konseho Sosial Ekonómiko (SER) Raúl Henriquez a entregá awe mainta e nota inisial ‘Future of Work’  na minister Hensley Koeiman di Desaroyo Sosial, Labor i Bienestar (SOAW) den presensia di e Direktor di Sektor di Asuntonan Laboral, Donate Philbert-Nieveld. E nota ta resultado di diferente seshon di trabou tékniko ku SER a organisá huntu ku e sektor di asuntonan di labor di e ministerio di SOAW. Na e seshonnan di trabou a partispá diferente representante di diferente sektor di e komunidat di Kòrsou, entre otro NGOnan, e sektor públiko, empresarionnan, prensa, sindikatonan, siensia i tambe young professionals.

Djamars 12 di yüni 2018 a aprobá e nota den kua ta indiká e linianan prinisipal kon Kòrsou por duna kontenido na e tema ‘Future of Work’ . E tema ku ta sentral durante e selebrashon di e shen aña di eksistensia di e Organisashon Internashonal (International Labour Organization – ILO) otro aña na Ginebra. Den e Nota a amplia mas riba e oportunidatnan i posibilidatnan di un merkado laboral ku ta kambiando. Aspektonan manera e potensial inovativo di Kòrsou i pa sigui desaroyá esaki den un‘smart nation’ i tambe a trata e desavionan den área demográfiko, teknológiko i klimatológiko. Durante e seshonnan di trabou a palabrá pa entregá e Nota na minister Koeiman ku e petishon pa esaki wòrdu ratifiká dor di Konseho di Minister. Awe mainta e entrega a tuma lugá.

E aspektonan ku den e Nota ta enfatisá den área di inovashon, desaroyo demográfiko i kambio di klima lo bai mas profundo i  mas den detaye, sostené pa sifranan, asina e dokumentu final no solamente ta karga un sosten sosial amplio, pero tambe ta sientífikamente bon fundá.

Riba potrèt: momento ku ta hasi entrega – di man robes pa man drechi sra. M. Sboui-Racamy, konsehera prinsipal na SER, sr. R. Henriquez, Sekretario general di SER, sr. H. Koeiman, minister di SOAW s sra. D. Philbert-Nieveld, direktora di asuntonan di labor na ministerio di SOAW.