Konsulta ofisial entre SER i Cft

Djamars atardi 10 di yüli 2018 a tuma lugá un konsulta entre sr. Raúl Henriquez, Sekretario General di Konesho Sosial Ekonómiko (SER), sr. Alcides Cova, miembro di SER representando e organisashon di trahadónan i algun konseheronan i sr. Manus Twist, Sekretario di e Kolegio di supervishon finansiero, College financieel toezicht (Cft). Durante e reunion di trabou a trese pa dilanti problemanan finansiero-ekonómiko. Entre otro a papia riba e manera kon Cft por duna kontenido na su ròl di supervishon basá riba e Rijkswet riba supervishon finasiero, e resultadonan obtené i e retonan di Kòrsou relashoná ku e sostenibilidat di finansas públiko. Tambe a profundisá riba e ròl konsultativo di SER den e área sosial-ekonómiko relashoná ku finansas públiko. Na final di e deliberashon, partidonan a yega na un akuerdo ku lo ta útil i efektivo si e miembronan di SER sinta na mesa ku e Cft kompleto di Kòrsou pa sera konosí ku otro i pa siguí interkambia di pensamentu tokante eventual medidanan ku no solamente ta garantisá sostenibilidat di finansas públiko pero tambe e sostenibilidat den e parti sosialekonómiko di Kòrsou.