Tayer riba e tema Futuro di Labor

WILLEMSTAD, 22 di mei 2018 – Kon merkado laboral di Kòrsou lo desaroyá den futuro? E pregunta aki tabata sentral durante un seshon di trabou ku a tuma lugá djamars dia 22 di mei último, organisá pa Konseho Sosial Ekonómiko (SER), konhuntamente ku Ministerio di Desaroyo Sosial, Labor i Bienestar (SOAW). E tayer a tuma lugá den e sala di reunion di SER na Ansinghstraat. Mas ku trinta partisipante, tur profeshonalnan rekonosé, representando diferente sektor importante den nos komunidat, a partisipá na e tayer.

Tambe minister Hensely Koeiman di SOAW tabata un di e presentenan

E tayer ta parti di un siklo di seshonnan pa yega na mas konsientisashon i diálogo den nos komunidat riba e tema ‘Future of Work’, ku e organisashon internashonal di labor ILO a skohé pa selebrá su di shen aña di eksistensia na 2019. Miembronan di ILO, manera Reino Ulandes, di kua Kòrsou ta forma parti di dje, a haña komo enkargo pa inisiá diálogonan nashonal riba e tema i pa manda e resultadonan di e diálogonan aki pa e organisashon mundial.

Durante e tayer di djamars último a elaborá ekstensivamente riba dos aspekto relatá na e tema prinsipal ‘Future of Work’, esta impakto di faktornan demográfiko (embiehesimentu, migrashon, ets.) riba merkado laboral i e abilidat pa sigui inová pa asina hasi Kòrsou mas kompetitivo riba merkado regional/internashonal.

Partisipantenan a deliberá ku otro riba e dos temanan den gruponan di trabou i a presentá nan resultado- i rekomendashonnan durante e seshon plenario. E resultado- i rekomendashonnan aki lo ser kompilá i presentá bèk i posiblemente ratifiká durante un seshon plenario ku lo tuma lugá dia 12 di yüni próksimo.