SER ta tene presentashon tokante robotisashon den e suministro di informashon

WILLEMSTAD, 7 di mei 2018 – Djabièrnè 14 di mei último un delegashon tékniko di e Konseho Sosial Ekonómiko (SER) a duna den e oula di Universidat di Kòrsou (UoC) un presentashon tokante e tópiko‘Robotisering in de informatievoorziening’. Esaki a tuma lugá durante e dia, ‘Information Management Day” ku tur aña e empresa, Professional Document & Information Management (ProDocit) ta organisá i kaminda ku profeshonalnan riba tereno di suminstro di informashon dokumentario, tantu for di e sektor públiko komo e sektor privá di tur e tres paisnan den Karibe di Reino ta partisipá. E delegashon di SER Kòrsou a wòrdu invitá pa motibu di su envolvimento den e tópiko akí pa duna un lektura kaminda a pone un konekshon ku e tema skohí dor di e Organisashon Internashonal di Labor (ILO) pa selebrashon di su shen aña di eksistensia den 2019, esta ‘The Future of Work and Social Dialogue’. Robotisashon i digitalisashon ta hunga un ròl ku no por wòrdu balotá pa motibu di nan impakto enorme ku nan tin riba merkado laboral. Durante su presentashon e delegashon di SER a elaborá spesifikamente riba e bentahanan i retonan di robotisashon pa  proseso administrativo.