‘Kolaborando na trabou signifikante’ ta sentral durante e kombersashon di introdukshon ku e direktor di CAOP

Den Haag/Willemstad, 24 di yüni 2019 – Kiko ta hasi trabou signifikante? Dikon esaki ta importante?  I sí esei ta asina importante, kiko nos por hasi pa protegá i sostené trabou signifikante? E preguntanan akí tabata sentral durante un kombersashon di introdukshon sostené 20 di yüni último na Den Haag entre e direktor/sekretario general di e Konseho Sosial Ekonómiko (SER) Raul Henriquez i e direktor di e fundashon, Stichting Centrum voor Arbeidsverhoudingen Overheidspersoneel (CAOP) Philip Geelkerken.

Komo sentro di informashon i servisio riba tereno di asuntonan di trabou den e sektor públiko i privá, CAOP tin un papel importante den profundisashon riba e tema ‘trabou signifikante’. Durante e kombersashon di introdukshon Henriquez i Geelkerken a deliberá mas riba e pregunta kiko ‘trabou signifikante’ ta presis i kon trahadónan i doñonan di trabou por atendé ku esaki. A enfatisá ku e tópiko ta realmente bibu i ku den e ekonomia ku propósito (the purpose economy) di siglo 21, e ta birando aun mas importante.

‘Trabou signifikante’ ta algo hopi personal  i ta p’esei e ta difísil pa definí òf deskribí, e dos kabayeronan ta atmití esei. Sinembargo, tres karakterístika general a wòrdu identifiká komo ‘trabou signifikante’,,Na promé lugá, trabou (hopi biaha) ta signifikante ora hende tin e sentimentu ku nan ta útil, mas aun si nan por hasi un diferensia pa otro. Na di dos lugá, (hopi biaha) trabou ta signifikante ora hende tin e sentimentu ku nan ta aportá ku nan propio kontribushon. Aki ta trata di pone nan propio seyo, algo ku nan a hasi òf a realisá basá riba nan abilidat i ekspertisio. Na di tres lugá, trabou (hopi biaha) ta signifikante ora hende tin e sentimentu ku nan a hasi un bon trabou.  Aki ta trata di ta kualifiká i kapasitá i tin ekpertisio”.

Segun e direktor di SER e tema ‘trabou signifikante’ mester haña atenshon tambe na Kòrsou den sírkulonan amplio, preferiblemente riba un manera bipartit i tripartit, den todo kaso ku partisipashon di gobièrno, doñonan di trabou i trahadónan. ,,Echo ta ku trahadónan ku ta eksperensiá nan trabou komo un trabou signifikante hopi biaha ta satisfecho i ta mas involví den nan trabou. Ademas, organisashonnan hopi biaha ta mas produktivo i ta prestá mihó si trahadónan  ta eksperensiá nan trabou komo signifikante. Tantu pa trahadó komo e doñonan di trabou, trabou signifikante ta produsí hopi otro resultado indirekto positivo”.

“Ora hende ta eksperensiá nan trabou komo signifikante, nan tin e tendensia pa keda traha largu un kaminda i nan no ta aktuá fásilmente no íntegro. I tambe e kalidat di dunamentu di servisio ta oumentá.”

Na final di e kombersashon e direktor di CAOP a entregá e buki ’17 verhalen over betekenisvol werk” na Henriquez. E direktornan a palabrá  ku otro pa wak si mas den kurso di e aña akí pa huntu por organisá un evento na Kòrsou, den forma di un reunion temátiko, riba ‘trabou signifikante’.

Riba e potrèt: e momento di entrega di e buki ’17 verhalen over betekenisvol werk”