Ku 15 aña ya ta papia tokante AOV
WILLEMSTAD, 20 di novèmber 2026 – Kon hóbennan ta mira e ròl di AOV? Djaweps 19 di novèmber último, 29 alumno di klas kuater di Dr. Albert Schweitzer havo-vwo a debatí e pregunta tokante di AOV na Konseho Sosial-Ekonómiko (SER). Den un reunion simulá, e alumnonan di 15 i 16 aña a hunga e ròl di miembronan independiente di e konseho.
Esnan ku ta biba na Kòrsou i tin derechi riba e penshun kompleto di Seguro General di Behes (AOV) ta risibí Cg 1.000 pa luna for di promé di yanüari. Promé nan tabata risibí Cg 862. Na sèptèmber, SER a duna konseho riba e proyekto di ordenansa pa fiha e oumento den lei ku efekto for di e mesun fecha.
Segun Ofisina Sentral di Statistik, entre 2011 i kuminsamentu di 2026 e kantidat di habitante di 65 aña òf mas na Kòrsou kasi a dupliká. Si preisnan subi, penshun tambe mester subi? I si esei nifiká ku trahadónan lo paga mas prima òf ku lo sobra ménos plaka pa enseñansa? Nan a debatí tambe e posibilidat di subi e edat pa risibí AOV si hende ta biba mas aña promedio.
Promé ku e bishita, e alumnonan a risibí informashon tokante AOV ku e sugerensia pa lesa e resúmen i e konklushon di e konseho di SER. E programa a kuminsá ku un splikashon kòrtiku di kon SER ta prepará su konsehonan. Un stazjèr a konta di su eksperensia na sekretariado tékiniko i e grupo a partisipá den un wega di pregunta i kontesta.
Tur aña e skol ta organisá un siman di proyekto pa laga alumnonan konosé mundu di trabou. E lema ta ‘anders leren’, siña di un otro manera. E aña akí, e skol ta pone énfasis riba e seis metanan di desaroyo sostenibel di Nashonnan Uní ku Kòrsou a skohe komo prioridat. Pa e alumnonan di Economie en Maatschappij, e bishita tabata ligá na SDG 8, trabou digno i kresementu ekonómiko.

