SER a entregá konseho riba AOV i AWW 

Willemstad, 14 di sèptèmber 2026 — Djaluna 14 di sèptèmber último, Konseho Sosial-Ekonómiko (SER) a entregá su konseho riba e proyekto di ordenansa nashonal pa oumentá AOV i AWW na minister di Finansa Sr. Charles Cooper i minister di Desaroyo Sosial, Labor i Bienestar (SOAW) Sra. Charetti America-Francisca. SER a aprobá e konseho durante su reunion ekstraordinario di djabièrnè 11 di sèptèmber último.

Un parti sentral di e proyekto ta e oumento di e penshun kompleto di Seguro General di Behes (AOV), di Cg 862 pa Cg 1.000 pa luna, pa personanan ku tin derechi riba dje i ku ta biba na Kòrsou. Ta paga e montante mas haltu for di promé di yanüari 2026. E proyekto ke fiha e oumento akí den lei, ku efekto retroaktivo for di e fecha ei. 

Tambe e proyekto ta proponé un oumento di e penshunnan di Seguro General di Biuda i Wérfano (AWW), ku promé di yanüari 2027 komo fecha tentativo p’esaki drenta na vigor. E seguro akí ta paga un penshun na biuda, biudo i wérfano ku ta kumpli ku e kondishonnan legal. E sumanan proponé ta varia segun edat i e kategoria ku lei ta stipulá. 

Tambe e proyekto ta kontené reglanan nobo pa adaptá e penshunnan periódikamente. Tantu e desaroyo di preisnan pa konsumidó komo kresementu ekonómiko ta hunga un papel den esaki. Ademas, tin stipulashon pa un gruponan spesífikamente definí di personanan ku tin derechi riba AOV i ku ta biba pafó di Kòrsou. E stipulashonnan ei tin komo meta duna kumplimentu na un sentensia di Korte Komun di Hustisia di promé di mart 2021. 

E tratamentu di e proyekto ta tuma lugá na un momentu ku e poblashon di Kòrsou ta embehesendo rápidamente. Segun Ofisina Sentral di Statistik (CBS), riba promé di yanüari 2026 Kòrsou tabatin mas di 40.000 habitante di 65 aña i mas: 25,9 porshento di poblashon. E kantidat di habitante den e grupo di edat akí kasi a dupliká den dies sinku aña. 

Esaki ta hasi ku e proyekto tin importansia pa diferente generashon. Pa adultonan mayó i famianan di personanan ku a fayesé, e montantenan di penshun ta influenshá direktamente nan posibilidat pa kubri gastunan di tur dia. Pa trahadónan, dunadónan di trabou i gobièrnu, e finansiamentu tambe ta hunga un ròl. AOV ta funshoná basá riba un sistema di reparto: ta usá e entradanan di prima di awor pa paga e penshunnan di awor. P’esei, e desaroyo di e kantidat di persona ku tin derechi riba penshun tin un relashon estrecho ku preguntanan tokante empleo, entradanan di prima i kontribushonnan di gobièrnu. 

SER a risibí e petishon di konseho di minister di Finansa riba 17 di yüli 2026.