Eksitoso encuentro tokante merkado laboral inklusivo

Willemstad, 13 di yüni 2024 – Human Rights Defense Curaçao (HRDC) a organisá, den kolaborashon ku Konseho Sosio-Ekonómiko (SER) i Pan American Development Foundation (PADF), un eksitoso encuentro ku enfoke riba promoshon di un merkado laboral inklusivo. E encuentro ku a tuma lugá riba 11 di yüni a trese representantenan di varios organisashon importante huntu, inkluyendo Vereniging Bedrijfsleven Curaçao (VBC), Machinery and Energy BV, Kolektivo Curaçao Foundation, Stichting Hulp aan Auditief Gehandicapten, Sentro Solari, Deloitte Caribbean, Klinika Capriles, Fundashon Alton Paas i e Curaçao Investment & Export Promotion Agency (CINEX).

Raul Henriquez, Direktor/Sekretario General di SER, a habri e encuentro di manera virtual for di Genève, kaminda, na nomber di e presidensia di e Asosiashon Internashonal di Konsehonan Sosio-Ekonómiko i Institushonnan Similar (AICESIS), e ta hibando komberasashonan durante e di 112 Konferensia Internashonal di Trabou di ILO. Henriquez a enfatisá e nesesidat di medidanan kla di maneho i strategíanan pa un merkado laboral inklusivo. E a hasi un yamada pa tuma pasonan konkreto pa atendé ku deskriminashon na boka di trabou, garantisá oportunidatnan igual pa tur empleado i implementá medidanan pa promové igualdat di ingreso. E a aklamá ku tantu dunado di trabou komo gobierno mester sostene aktivamente diversidat i inklushon den tur sektor ekonómiko.

Raynel Martis, direktor di PADF Aruba y Kòrsou, a moderá e encuentro y a duna un bista di inisiativanan regional i konosementu di PADF dirigi riba sostené gruponan vulnerabel i e kolaborashon ku gobierno, NGO-nan i sektor privá pa integrá migrantenan den merkado laboral. E a referí na proyektonan aktual, entre otro, na Colombia, Brazil, Trinidad & Tobago, Aruba i Kòrsou.

Raymond Jamanika, direktor di HRDC, a enfatisá e nesesidat di un merkado laboral inklusivo dor di mehorá e akesibilidad den sentro di siudat i edifisionan en general pa hende ku tin un limitashon. E a deklará ku migrantenan indokumentá i personanan ku tin un limitashon tin mesun derechi ku tur otro hende. Tambe, e a papia tokante e nesesidat di kolaborashon ku invershionistanan sosialmente responsabel.

Barbara Perquin, konsehera mayor na SER, a deskribí e historia di esfuersonan desplegá, kuminsando ku e petishon di e Promé Minister di 2018 pa un ‘Maneho di Poblashon pa Kòrsou’. Esaki a kondusí na un simposio ‘Migrashon i Desaroyo Sòsio-Ekonómiko’ na mei 2019, dos publikashon di SER riba e tema, dos diskushon di mesa rondo i un sigiente simposio. E esfuersonan aki a resultá den un karta di konseho di SER na gobièrnu di Kòrsou na mei 2023 i un manifèst pa un merkado laboral inklusivo, ku a keda ofresé riba 24 di november 2023 na varios grupo di interes.

Daniel Hodge, presidente di VBC, a enfatisá e retonan aktual di e sistema di seguridat sosial, spesifikamente e seguro di penshun general (AOV). E a abogá pa ampliashon di e forsa laboral i modernisashon di lèinan laboral, ku mas fleksibilidat pa inklushon di hende muhé i personanan ku un limitashon.

Alex Rosaria, mènedjer di programa na HRDC, a trese tendensianan demográfiko na Kòrsou dilanti i a bogá pa un aktualisashon di e maneho di poblashon. E a deklará ku subida di e edat di penshun (AOV) no ta un solushon pa largo plaso i a enfatisá e nesesidat di kresementu di e poblashon i evaluashon di aserkamentu di migrashon den pasado.

Esnan presente a diskuti e retonan i solushonnan tokante inklushon di personanan ku limitashon i migrantenan indokumentá den merkado laboral. Nan a kompartí eksperensianan i a enfatisá e importansia di mehorá transporte, edifisionan, preparashon laboral i formashon pa personanan ku limitashon fisico i mental.

E encuentro a ofresé un plataforma balioso pa dialogo i kolaborashon entre varios grupo di interes, ku e meta pa promové un merkado laboral mas inklusivo na Kòrsou. HRDC i SER ta determiná pa kontinuá ku e dialogonan aki i tuma pasonan konkreto pa promové inklushon i igualdat den merkado laboral.