SER ta liderá seshonnan importante durante foro iberoamerikano

Willemstad, 14 di mei 2024 – Konseho Sosial Ekonómiko (SER) di Kòrsou, representá riba mandato di e presidente interino, pa un delegashon ofisial enkabesá pa e direktor i sekretario general Drs. R. J. Henríquez, a partisipá ku presensia distinguí na e prestigioso Foro Iberoamerikano di Konsehonan Ekonómiko i Sosial i Institushonnan Similar. E evento, ku a tuma lugá dia 7 te ku 10 di mei último na e Sentro di Formashon di Koöperashon Spañó na Cartagena de Las Indias, Colombia, a enfoká riba demokrasia, paktonan, konsenso i e papel krusial di e konsehonan konsultativo sosioekonómiko den promoshon di polítika públiko pa mehorá gobernashon demokrátiko, sostenibilidat i kambio di klima.

Komo presidente di e ret regional CESISALC (Konsehonan Ekonómiko i Sosial i Institushonnan Similar di Amérika Latina i Karibe), SER di Kòrsou a dirigí e seshonnan di 9 i 10 di mei. E enkuentro importante aki, organisá pa e Konseho Ekonómiko i Sosial di Spaña i e Agensia Spañó di Koöperashon Internashonal pa Desaroyo (AECID), a sirbi komo plataforma pa diskutí profundamente e retonan di e region iberoamerikano, inkluso e papel di diálogo sosial institushonalisá den fortifikashon di strukturanan demokrátiko.

Durante nan intervenshonnan tokante transishon ekológiko i digital, e delegashon di Kòrsou a usa informashon aktual i relevante optené for di e Plataforma di Kambio di Klima di Kòrsou (CCCP) i di e asosashon SIMIA, ku ta enfoká riba promové e industria di software stimulando eksportashon di solushonnan di informátika produsí lokalmente. E atenshon a konsentrá riba promoshon di turismo sostenibel, fuentenan di energia renovabel, manera di bientu i solar, i proyektonan marítimo inovador, en partikular e inisiativa Proteus, un stashon di investigashon avansá bou di awa, observatorio i plataforma di investigashon. Atenshon tambe a ser dediká na e transishon digital, spesífikamente na e uso kresiente di inteligensia artifisial generativo, i na importansia di e industria di software komo un pilar ekonómiko nobo pa Kòrsou. Esaki huntu ku sektornan eksistente manera turismo i servisionan finansiero i ku e posibilidat di un reaktivashon di aktividatnan di refinashon di petrolio.

Ret Iberoamerikano

Durante e foro a mantené kombersashonnan mas detayá ku e Sekretaria General Iberoamerikano tokante e posibilidat pa establesé un ret di konsehonan konsultativo sosioekonómiko iberoamerikano. Ounke Kòrsou, komo un pais outónomo den Reino Hulandes, no ta forma parti di e 22 paisnan iberoamerikano, SER di Kòrsou a suprayá su deseo di forma parti di un ret asina aki komo miembro di CESISALC, ku lo inkluí e 19 paisnan di abla Spañó i Portugues di Latinoamérika, huntu ku Spaña, Portugal i Andorra. Partisipashon den e ret aki por pèrmití Kòrsou kompartí i optené informashon tokante desaroyo di polítika na ámbos banda di Atlántiko.

Durante e foro di kuater dia aki, mas ku 34 delegado di nivel haltu for di 11 pais di Latinoamérika, Karibe i Europa a diskutí tokante integrashon di maneho di sostenibilidat, kambio di klima i maneho sosioekonómiko. E reunion a asentuá e papel krusial ku e konsehonan sosioekonómiko ta hunga den asesorá i formulá maneho ku ta promové koherensia sosial i stabilidat ekonómiko. Tambe tabat’ei presente representantenan di Organisashon Internashonal di Trabou (OIT), Organisashon di Koöperashon i Desaroyo Ekonómiko (OCDE) i e Organisashon di Nashonnan Uní pa Agrikultura i Alimentashon (FAO), ku a kontribuí na e diskushonnan tokante e temanan importante aki.

SER di Kòrsou ta rekonosé e balor di koöperashon internashonal i interkambio di konosementu i mihó práktikanan. E reunion a kontribuí na fortifikashon di e posishon di Kòrsou den e panorama sosioekonómiko iberoamerikano i a generá idea i kompromisonan ku por ta relevante pa desaroyo di futuro maneho na e isla.