Minister Larmonie-Cecilia ta presentá propuestanan di reforma durante reunion di SER

Willemstad, 19 di aprel 2024 – Riba invitashon di Konseho Sosial Ekónómiko (SER), Minister di Desaroyo Sosial, Labor i Bienestar (SOAW), Sra. Mr. Ruthmilda Larmonie-Cecilia, a duna un presentashon detayá riba e resultadonan resién di e investigashon tokante e sistema di siguridat sosial di Kòrsou. E presentashon a tuma lugá durante e seshon plenario regular di e órgano konsultivo tripartit.

E investigashon, realisá komo parti di Pakete di Pais Kòrsou, ta enfoká riba aspektonan krusial di e sistema di siguridat sosial pa redusí probesa, oumentá siguridat di entrada, i garantisá durabilidat finansiero. E minister, durante e reunion, tabata asesorá pa su konseheronan, representantenan di Banko di Seguro Sosial (SVB), i un eksperto di e Ofisina Ekonómiko di Amsterdam.

Despues di e presentashon, miembronan di SER por a hasi pregunta i komentá riba e rekomendashon i konklushonnan di e rapòrt dje investigashon. Minister Larmonie-Cecilia a indiká ku lo huza e fase aktual pa mas konsulta ku tur stakeholder relevante, despues di kua lo konsiderá e proposishonnan denter di sírkulonan polítiko-gubernamental. Esaki lo kondusí na toma di desishon ku lo influenshá e panorama di siguridat sosial na Kòrsou. E mandatario a primintí di tene SER, komo órgano importante di konseho i konsulta , informá enkuanto progreso di e trayekto aki.