SER den su último informe: 

Perspektiva krítiko riba reformanan fiskal 

Willemstad, 26 di mart 2024 – Konseho Sosial i Ekonómiko (SER) a emití djamars último, 26 di mart, un konseho na Minister di Finansa Sr. mr. drs. Javier Silvania tokante algun reforma fiskal, inkluyendo un redukshon den e tarifa di impuesto riba ganashi.  

Ku aprobashon di Parlamento di Kòrsou, e minister tin intenshon di apliká un tarifa redusí di impuesto riba ganashi di 15% riba e promé NAf. 500.000 di e sumanan, suheto na impuesto, di empresanan lokal pa medio di un kambio den e Ordenansa Nashonal Impuesto riba Ganashi. Esaki, ku forsa retroaktivo te ku promé di yanüari 2023, miéntras ku un tarifa di 22% di impuesto riba ganashi lo sigui ser apliká riba entradanan ku ta mas ku e suma di NAf 500.000.

Ademas, e modifikashon na e Ordenansa Nashonal riba Zonanan Ekonómiko ta buska pa eliminá e restrikshon ku ta impedí empresanan den e zonanan aki di bende mas ku 25% di nan benta na merkado lokal, pa asina ei promové integrashon ku e ekonomia lokal. E medidanan aki, ku ta parti di un pakete mas amplio di reformanan fiskal, ta destiná pa stimulá ekonomia lokal i brinda sostén na empresanan chikitu i esnan ku ta inisiá.  

E opinion di SER, ku a evaluá e kambionan proponé riba koherensia, efisiensia, efektividat, i impakto sosioekonómiko, ta ser konsiderá di importansia ya ku Parlamento ainda mester trata i aprobá formalmente e proyekto di lei ku ta introdusí e reformanan.