Konsehonan Ekonómiko i Sosial (SER) den Latino-Amérika i Karibe ta uni pa un futuro di ’Prosperidat Amplio’ 

Willemstad, 9 mart 2024 – Den un reunión virtual bou di presidensia di Konseho Sosial-Ekonómiko (SER) di Kòrsou, a pone e fundeshi pa un futuro di ‘Prosperidat Amplio’ den Latino-Amérika i Karibe. E reunión importante aki a marka e promé enkuentro di aña 2024 pa e Ret di Konsehonan Ekonómiko i Sosial i Institushonnan Similar di Latino Amérika i Karibe, konosí bou di e nomber CESISALC. 

Representantenan di paisnan manera Argentina, Guatemala, Repúblika Dominikana, Honduras, Kòrsou i Peru a interkambia perspektiva i vishon riba e tema di ‘Prosperidat Amplio’ riba 6 di mart. E termino aki, ku ta bira mas i mas komun den debate públiko, ta inkluí no solamente kresementu ekonómiko, pero tambe aspektonan manera inklushon sosial, medio ambiente i kalidat di bida. 

E reunión digital no solamente tabata un plataforma pa kompartí ideanan, pero tambe un komienso pa implementá un agenda stratégiko. Bou di liderazgo di SER di Kòrsou, nan a desaroyá un mapa ku obhetivonan pa e próksimo dos aña, ku ta enfoká riba reforsá dialogo sosial i demokrasia den e region. 

E forsa di e konferensia virtual tabata den e unión di perspektivanan diverso, pa fomenta debate i komparti bon praktikanan. Tur esaki ta dirigí pa promové un enfoke hòlistiko di prosperidat ku ta bai mas leu ku e produkto interno bruto (PIB). 

Komo moderador i guía di e dialogo konstruktivo aki, SER di Kòrsou a enfatisá e importansia di dialogo sosial institushonalisá komo fundeshi pa reforsá demokrasia i desaroyo sosio-ekonómiko. E resultadonan positivo di e reunión aki ta prometé hopi pa futuro, ku e próksimo enkuentro físiko ya planiá pa mei di e aña aki na Cartagena de Indias, Colombia. Eynan, e miembronan di CESISALC lo sigui traha riba e kaminda pa prosperidat amplio, un kaminda ku no solamente ta pone rikesa na promé lugá, pero tambe bienestar i sostenibilidat.