Studiantenan di Den Haag ta sera konosí ku trabounan di SER

Willemstad, 18 di yanüari 2023 – Un grupo di studiantenan ambisioso di terser aña di Haagse Hogeschool, huntu ku nan instruktornan, a wòrdu kordialmente risibí dor di Konseho Sosial Ekonómiko (SER). E enkuentro, ku a tuma lugá den aire liber djárason 17 di yanüari último, a ser organisá stratégikamente na ‘t Klooster Boutique Hotel en konekshon ku resurgimentu di COVID-19 i otro variantenan di grip na Kòrsou, pa garantisá un ambiente sigur i interesante pa un interkambio fruktífero.

Spesialisando nan mes den atministrashon públiko, derechi, estudio Europeo, i atministrashon di negoshi, e studiantenan aki ta forma parti di e “Minor” di ‘Relashonnan den Reino (Koninkrijksrelaties), un programa ku ta proporshoná un perspektiva práktiko tokante gobernashon den Reino i ku énfasis riba atministrashon públiko den e parti Karibeño di Reino Hulandes.

E bishita akadémiko na Kòrsou ta inkluí enkuentronan ku instansianan klave manera, entre otro, Kolegio di Supervishon Finansiero (Cft), Parlamento, i tambe un kaminata kultural den área di Otrobanda, pa yuda nan komprondé e parti aki di reino mihó. E seshon na SER tabata partikularmente iluminante, enfokando riba e papel ku SER tin komo asesor di Gobièrnu i di Parlamento riba temanan ku un karakter sosioekonómiko, prioridatnan temátiko, i kompromisonan internashonal. E studiantenan a partisipá den diskushonnan vibrante, elaborando riba retonan sosioekonómiko aktual.

Steven de Lira, e autor yu di Kòrsou, famoso pa su buki “Tur Hende ta un Mèntòr,” a ser invitá pa konseheronan di SER, pa hiba algun palabra introduktorio, enfokando riba métodonan di kolaborashon den Reino Hulandes. Su presentashon a resaltá e papel inovadó di SER den yuda fomentá un plataforma di mentoring pa hóbennan den henter Reino, aliniando asina ei ku metanan mas amplio di desaroyo sosial i ekonómiko.

E kolaborashon entre Haagse Hogeschool i SER di Kòrsou ta sigui prosperá, teniendo na kuenta bon eksperensia ku e órgano estatal tin ku stazjèrnan durante 2023 i e echo ku pronto un stazjèr nobo lo kuminsá na SER. E kolaborashon aki ta suprayá e dedikashon di SER pa ofresé eksperensia práktiko ku ta krusial pa kresementu profeshonal i personal di e studiantenan.