Representante permanente di AICESIS na ONU di bishita na SER Kòrsou

Willemstad, 12 di yanüari 2024 – Dr. Hanifa D. Mezoui, e representante permanente di e Asosashon Internashonal di Konsehonan Ekonómiko i Sosial i Institushonnan Similar (AICESIS) ku status di opservadó na Konseho Sosial i Ekonómiko di Nashonnan Uni (ECOSOC) na New York, a hasi un bishita di kortesia na Konseho Sosial i Ekonómiko (SER) di Kòrsou riba djabièrnè, 12 di yanüari 2024.

For novèmber di aña pasá, ora ku SER a asumí e presidensia di AICESIS, e ta komprometé na oumentá koperashon i diálogo internashonal. Durante e enkuentro aki, dr. Mezoui a kompartí su pensamentunan riba desafionan mundial manera e pandemia di COVID-19, e krísis klimátiko, i tenshonnan geopolítiko. E tema di ECOSOC pa 2024, ku ta dirigí riba aselerá e logro di e Metanan di Desaroyo Sostenibel di Nashonnan Uní (SDGs), a ser diskutí. Atenshon spesial a ser duná na eliminá pobresa, promové akshon klimátiko, i fortifiká koperashon internashonal.

E Foro Polítiko di Alto Nivel riba Desaroyo Sostenibel, planiá pa yüli e aña aki na kuartel general di Nashonnan Uní na New York, lo enfoká riba evaluá e progreso di e metanan aki. E bishita di dr. Mezoui ta suprayá e importansia di koperashon multilateral den enfrentá asuntunan mundial.

E reunion tambe a mira dilanti pa e Kumbre di SDG na sèptèmber 2024 na New York, ku lo sirbi komo un plataforma pa fortifiká e kompromiso mundial na multilateralismo. E kumbre aki, ku e tema “Solushonnan Multilateral pa un Futuro Mihó,” lo resultá den “Un Pakto pa Futuro.” E dokumento, ku ta unu orientá riba akshonnan konkreto, ta pa aselerá progreso di SDG, atendé desafionan emergente, i fortifiká gobernashon mundial i derechonan humano.

E ròl prominente di SER di Kòrsou komo presidente di AICESIS den e diálogonan internashonal aki ta resaltá su kompromiso pa kontribuí na prosperidat mundial i desaroyo sostenibel.