SER ta duna konseho tokante oumento di suèldu mínimo bou di preshon di tempu

Willemstad, 22 di desèmber 2023 – Awe, djabièrnè 22 di desèmber 2023, Konseho Sosial Ekonómiko (SER) a emití su konseho tokante revishon di suèldu mínimo ku ta drenta na vigor dia 1 di yanüari 2024.

Dia 15 di desèmber último, SER a risibí un petishon pa duna konseho, ku a sigui despues di un desishon di Konseho di Ministernan di 13 di desèmber 2023. E proposishon ta inkluí un oumento di salario mínimo di NAf. 10,70 pa NAf. 11,28 entrante 1 di yanüari 2024, basá riba un kresementu di 5,4% den e índise di preis pa konsumo di famia.

SER ta rekonosé ku e tempu kòrtiku pa duna un konseho tabata tin su retonan pa ku envolvimentu di tur aktor, kual ta esensial pa yega na un opinion balansá ku ta tene debido kuenta ku tur interesnan . No opstante e preshon di tempu aki, e órgano di konseho i konsulta tripartit a basá su konseho riba investigashonnan profundo hasí den pasado tokante kambio di salario mínimo, análisis di datonan, i literatura sientífiko relevante.