Konferensia riba Futuro di Trabou 2023 na Kòrsou 

SER: “Un vishon pa inovashon, inklushon i impakto sosioekonómiko” 

Willemstad, 17 di òktober 2023 – Organisá pa Konseho Sosial Ekonómiko (SER) di Kòrsou, e konferensia “Futuro di Trabou na Kòrsou – Teknologia, Inteligensia Artifisial i Migrashon” a tuma lugá den ouditorio di Banko Sentral di Kòrsou i Sint Maarten (CBCS) na Scharloo djaluna, 16 di òktober último. E enkuentro, ku a konta ku partisipashon físiko di 145 persona i online pa sentenáres di hendenan interesá ku a siguié pa medio di ‘live streaming,’ a ofresé vishonnan inovativo riba e retonan sosioekonómiko aktual di Kòrsou. 

Minister di Enseñansa, Siensia, Kultura i Deporte, Sr. Sithree van Heydoorn, i Sr. Raul Henriquez, Direktor/ Sekretario General di SER, a pone atenshon riba temanan ku ta estriktamente konektá ku e komunidat di Kòrsou aktual. Komplementario na esaki, Ofisina Sentral di Statistik (CBS) a resaltá e urgensia di e temanan ku uso di datonan kuantitativo. E datonan aki ta inkluí e rapides di transformashon digital, ku mas ku 65% di kasnan konektá na Internet, i tendensianan demográfiko manera enbehesementu i redukshon di nos poblashon, ku 148,925 habitante registrá 1 di yanüari 2023. 

E konferensia a bai mas ayá di reflekshon simpel i a presentá análisis detayá di tendensianan di futuro di merkado laboral lokal. E enfoke tabata riba diversifikashon for di e ekonomia tradishonal guiá pa turismo pa sektornan ku ta kresiendo manera IT, energia renovabel, i e, asina yamá, Orange Economy. E rapòrt mas resien “Futuro di Trabounan” di Foro Ekonómiko Mundial (World Economic Forum) a wòrdu sitá; esaki ta pronostiká ku 14% di e poblashon laboral mundial lo mester kambia di trabou pa 2030 komo resultado di outomatisashon i digitalisashon. 

Investigashon hasí pa Curaçao Innovation & Technological Institute (CITI) a resaltá un kambio den e sektor finansiero lokal pa profilnan di trabou nobo manera spesialistanan di Fintech, analistanan di Cybersecurity i Data Scientists. Ademas, CITI a identifiká un nesesidat kresiente pa desaroyadó di software i analistanan di data den e sektor IT lokal. 

Mas aleu a enfatisá e importansia di un sistema di enseñansa i di edukashon resiliente ku ta prepará hóbennan pa un merkado laboral ku ta kambiando rápidamente. Atenshon spesífiko a wòrdu duná na habilidatnan prinsipal ku lo ta krusial pa empleonan di futuro. E habilidatnan aki ta inkluí, entre otro, inteligensia emoshonal, pensamentu analítiko, siñamentu aktivo i efisiente, solushon di problema, análisis krítiko, kreatividat, liderazgo i konosementu i dominio teknológiko. 

Kulminashon di e konferensia tabata e palabrashon konkreto ku tur partisipantenan lo risibí un konsepto di un manifesto pa nan por duna nan input mas pronto ku ta posibel. E dokumento aki lo no tin un karakter simbóliko, sino e lo representá e boluntat i kompromiso kolektivo di tur partisipantenan. Un struktura di implementashon multi-sektorial lo ta responsabel pa konvertí e vishon aki den plannan di akshon konkreto. 

E dia a sera ku un momentu di ‘networking’, kual por wòrdu mirá komo un prolongashon natural di e diskushonnan profundo ku a tuma lugá dor di dia. E konferensia por wòrdu mirá kompletamente riba Nos Pais Television, kanaal 4. Pa mas informashon tokante e konferensia i aktividatnan di futuro, por bishita e wèpsait ofisial di SER: www.ser.cw.