SER i CBCS: Krísis di data por menasa investigashon i maneho futuro

Willemstad, 5 di òktober 2023 – Un eskases di data konfiabel, aktualisá i fásilmente aksesibel por ta un opstákulo signifikante pa investigashonnan sosioekonómiko i makroekonómiko profundo na Kòrsou. Esaki tabata e konsenso indiskutibel lográ durante un enkuentro stratégiko entre representantenan tékniko di Konseho Sosial-Ekonómiko (SER) di Kòrsou i Banko Sentral di Kòrsou i Sint Maarten (CBCS).
E enkuentro a tuma lugá na e ofisinanan di SER na Ansinghstraat. Presente tabata Sr. Raul Henriquez, Direktor/ Sekretario General di SER, huntu ku konseheronan di SER. Nan tabata tin komo huéspet Sr. Richard Doornbosch, Presidente di Banko Sentral, i e funshonario haltu di CBCS Sr. Eric Matto. E enkuentro no tabata unu di mero introdukshon; e la sirbi komo un foro pa interkambiá puntonan sentral di e agèndanan di investigashon di kada entidat pa e periodo 2023-2024 i pa identifiká áreanan potensial pa kolaborashon.
Miéntras ku e agènda di investigashon di CBCS ta enfoká riba sistemanan monetario i finansiero, balansa di pago, finansa públiko, kambio klimátiko, i kresementu inklusivo, e enfoke di SER ta diferente pero komplementario. SER ta konsentrá su mes riba temanan manera bienestar amplio, merkadonan di trabou inklusivo, migrashon laboral, futuro di trabou, i durabilidat di e sistema di siguridat sosial. Ámbos partido a rekonosé e potensial signifikante pa esfuersonan koperativo i interkambio resíproko di ekspertisio.
E enkuentro a finalisá ku un kompromiso mutuo pa fortifiká aliansanan eksistente. E dos institushonnan a komprometé nan mes pa sigui utilisá e sabiduria i habilidatnan di kada un, enrikesiendo asina e ámbito di koperashon inter-institushonal.