SER ta hisa bandera pa metanan di desaroyo sostenibel

Willemstad, 26 di sèptèmber 2023 – Ku e hisamentu di e bandera di Metanan di Desaroyo Sostenibel (SDGs) dilanti di su ofisina na Ansinghstraat den e distrito di Pietermaai , Konseho Sosial i Ekonómiko (SER) di Kòrsou un biaha mas ta suprayá su kompromiso pa un futuro responsabel i duradero. E akto di seremonia anual aki, ku awor a bira un tradishon establesé, ta pone énfasis riba e importansia di e 17 Metanan di Desaroyo Sostenibel manera a formulá pa Nashonnan Uní.

E hisamentu di e bandera ta mas ku un akto simbóliko; e ta marká e enfoke integrá di SER pa duna e metanan global aki un lugá prominente den su konsehonan na Gobièrnu i Parlamento di Kòrsou. E kompromiso étiko i stratégiko aki ta reflehá e importansia di un maneho koherente ku ta trata tantu e dimenshonnan ekonómiko komo tambe sosial i ambiental.

Na un momentu ora ku mundu ta hasiendo frente na retonan diverso, variando for di instabilidat ekonómiko i desigualdat sosial te ku kambio di klima, e Metanan di Desaroyo Sostenibel ta ofresé un kuadro étiko i práktiko pa esnan responsabel pa maneho gubernamental. E hisamentu di e bandera ta fungi komo un rekuerdo permanente di e responsabilidat i ambishon kompartí aki.