Gobernador ta resaltá desafionan pa Kòrsou durante apertura di aña parlamentario nobo

SER ta sigui dediká na solushonnan multidisiplinario i basá riba dato 

WILLEMSTAD, 13 di sèptèmber 2023 – Su ekselensia Gobernadó di Kòrsou sra. L.A. George-Wout, durante su diskurso na okashon di apertura di e aña parlamentario nobo djamars 12 di sèptèmber último, a enfoká riba algun reto. Sra. George-Wout, den su kalidat komo hefe konstitushonal di gobièrnu, a enfatisá ku ainda mundu ta sinti konsekuensia di e pandemia di COVID-19, i ku Kòrsou no ta un eksepshon. Pa purba suavisá e impaktonan sosial i ekonómiko di e pandemia, e gobièrnu di turno a hasi fiansa di likides kuantioso na Hulanda.  

Instabilidat finansiero na ENNIA 

Aparte di e konsekuensianan di e pandemia, na 2018 Banko Sentral a pone un kompania di seguro importante den nos pais, esta ENNIA, bou di e asina yamá “Noodregeling” (Areglo di Emergensia) pa motibu di iregularidatnan ku a tuma lugá na e kompania di seguro, loke a laga ENNIA den un mal estado finansiero i asina a pone na peliger penshun di 25.000 asegurado. ,,Ta imperativo pa resolvé e problema akí ya ku e por tin konsekuensia serio pa nos situashon sosial i e stabilidat finansiero di e union monetario entre Kòrsou i Sint Maarten”, asina sra. George-Wout a trese pa dilanti. 

Garantisá kuido hospitalario dor di CMC 

Otro punto di atenshon ku Gobernador a trese dilanti, ta e kontinuidat di kuido den nos hòspital, Curaçao Medical Center (CMC). ,,Pa gobièrnu ta di sumo importansia di por garantisá kontinuidat di kuido na nos pais. P’esei gobièrnu i e direktornan di CMC a sera un asina yamá “hoofdlijnenakkoord” den kua a hinka tur e puntonan di atenshon ku mester solushoná pa por garantisá kuido na CMC.” 

,,Tur e tres akontesimentunan menshoná, ku por kategorisá komo inusual, lo por tin konsekuensia signifikativo pa presupuesto di 2024”, asina sra. George-Wout a enfatisá. Mirando e echo ku e negosiashonnan tokante e akontesimentunan ariba menshoná posiblemente lo tin un impakto signifikante riba presupuesto 2024, gobièrnu ke enfatisá ku lo e entregá un nota di kambio despues ku e negosiashonnan ku Hulanda i e investigashon na CMC finalisá i ku e kondishonnan di tur dos fiansa i e alternativanan pa e problemátika di CMC a base di e rapòrtnan di e instituto independiente eksterno ta konosí. Mester mira e presupuesto di 2024 por lo tanto komo unu provishonal ku lo adaptá tan pronto e konsekuensianan finansiero di e negosiashonnan i e rapòrtnan menshoná ta konosí”, asina Gobernadó a terminá e parte introduktorio di su diskurso na parlamento. 

Konseho Sosial Ekonómiko (SER) ta suprayá e importansia di un enfoke multidisiplinario pa enfrentá efektivamente e retonan aki. Konforme nos mishon, nos ta sigui entregá konsehonan detayá, basá riba datonan, validá, na gobièrnu i parlamento, ku e ambishon di sigui kontribuí na un futuro mas stabil i próspero pa e isla.