Diálogo konstruktivo entre SER i Promé Minister Pisas ta pone base pa proyekto di lei ambisioso di kalidat di aire

Willemstad, 7 di sèptèmber 2023 —Djabièrnè, 25 di ougùstùs último, a tuma lugá un interkambio fruktífero, riba inisiativa di Konseho Sosial Ekonómiko (SER), ku Promé Minister Gilmar Pisas. E diskushon a konsentrá su mes riba e proyekto di e ordenansa tokante Kalidat di Aire ku SER a haña resientemente pa konseho. Promé Minister Pisas, operando den su kapasidat komo minister sin portafolio, enkargá ku agrikultura, medio ambiente i naturalesa, tabata kompañá pa ekspertonan di e ministerionan di Salú, Medio Ambiente i Naturalesa (GMN) i Asuntunan General (AZ).

Durante e enkuentro, e ekspertonan di ámbos ministerio a duna un presentashon detayá na e miembronan di SER tokante e proposishon di lei aktual. E splikashon informativo aki a trese klaridat riba puntonan klave di e konsepto di lei, hasiendo posibel pa SER, komo órgano konsultivo i di konseho di gobièrnu, emití un konseho profundo i bon fundá.

Ámbos partido a mustra nan mes satisfecho despues di e enkuentro konsiderando e naturalesa konstruktivo i e forma kon e diálogo a bai.

Promé Minister Pisas a enfatisá despues di e enkuentro e importansia di e okashon aki komo un paso krusial dilanti den e realisashon di e responsabilidatnan legal i sosial ku su gabinete tin. Esaki ta inkluí un búskeda aktivo pa un Kòrsou sostenibel, kaminda medio ambiente, naturalesa i salubridat públiko ta ser protehá di un manera adekuá, konforme Areglo di Estado di Kòrsou i otro lei- i regulashonnan aplikabel.