Habriendo kaminda pa un aserkamentu hòlistiko pa un merkado laboral inklusivo na Kòrsou

Willemstad, 5 di sèptèmber 2023 – Riba 31 di òktober 2023, Konseho Sosial-Ekonómiko (SER) a organisá un simposio ku a titulá ‘Promoshon di un Merkado Laboral Inklusivo na Kòrsou: Eksplorando Aserkamentunan Inovativo’, den koperashon ku Organisashon Internashonal di Trabou (ILO), Universidat di Korsou (UoC), Halto Komisariodo pa Refugiado di Nashonan Uní (UNHCR), i Human Rights Defense Curaçao (HRDC). E simposio tabata tin komo meta eksplorá un bista inklusivo pa Kòrsou, na nivel lokal i den perspektiva internashonal mas amplio.

E evento a kuminsá ku un palabra di apertura di Sr. Drs. Raul Henriquez, direktor/sekretario general di SER. Den su diskurso, el a enfatisá e importansia di rekonosé i respetá identidat individual di tur habitante di Kòrsou, sin importá nan orígen, status legal, òf situashon personal. Tambe, el a suprayá e nesesidat di un kompromiso fuerte pa krea un ambiente hustu kaminda kada siudadano i habitante por biba i traha ku dignidat, igualdat di derechonan, i ku rèspèt. E meta final ta pa establesé un merkado laboral na Kòrsou ku no solamente ta inklusivo riba papel, pero ta berdaderamente humano, hustu, i sostenibel.

Dr. Francis de Lanoy, Rector Magnificus di UoC, a presentá su bista durante su diskurso ku a titulá ‘Bridging the Gap between Education and the Labor Market’ (Konektá e Bùraku entre Edukashon i Merkado Laboral). El a enfatisá ku edukashon ta e prinsipal hèrmènt pa kombatí pobresa i redusí desigualdat. Sinembargo, el a menshoná e defisiensianan di e sistema edukashonal aktual den promoshon di inklusividat. Dr. de Lanoy a duna rekomendashonnan balioso, inkluyendo e introdukshon na gran eskala di formashon vokashonal den koperashon ku un agensia di sertifikashon, suprayá e balor di formashonnan vokashonal, stimulashon di espíritu empresarial tékniko i sosial, inklushon di empresarionan den desaroyo di un forsa laboral kompetente, i amplia posibilidatnan di empleo pa graduadonan di formashonnan vokashonal dor di un sistema di edukashon ku ta enfoká riba kompetensia i enfatisando aplikashon di abilidatnan di siglo 21. Ademas, e la sugerí pa introdusí e asina yama Asociate degree den enseñansa di terser nivel na Kòrsou, kual lo kontribuí na un sistema di edukashon ku ta konektá mihó ku eksigensianan di merkado laboral i ku ta promové inklusividat i igualdat di oportunidat.

Direktor di HRDC, Sra. Ieteke ‘Inchi’ Witteveen, a enfatisá, durante su intervenshon, e fragmentashon eksistente den maneho di retonan aktual i a sugerí un enfoke hòlistiko. E la suprayá ku ta krusial pa definí na un manera kla kiko Kòrsou ke komo pais i kon e lo kier establesé un merkado laboral inklusivo. Tambe e la pone énfasis riba e importansia di un merkado laboral inklusivo pa e desaroyo deseá, sinembargo mustrando riba e nesesidat pa kibra kadenanan di dependensia. E responsabilidat pa esaki no ta solamente di gobièrnu, pero di tur hende.

E oradó prinsipal di e simposio, Sr. John Bliek, spesialista mayó den desaroyo empresarial sostenibel pa region di Karibe di ILO, a enfatisá ku e meta di un merkado laboral inklusivo ta pa krea un mihó komunidat, kaminda migrantenan ta forma un parti integral. El a yama atenshon na e retonan ku migrantenan den region di Latinoamérika i Karibe (LAC) ta konfrontá, spesialmente hende muhé ku hopi biaha ta traha den ekonomia informal òf ta den posishonnan vulnerabel riba merkado laboral. El a enfatisá ku e pais huéspet mester enfoká riba fomentá abilidatnan di migrantenan, kual ta generá benefisio manera reakshon mas efektivo riba demanda i oferta di merkado laboral, ampliashon di abilidatnan disponibel, i un kontribushon positivo na ekonomia ora ku migrantenan ta traha den sektor formal.

Sra. Melissa Johns, asesor mayó di desaroyo na e ofisina pa e region de Amérika di UNHCR, a kontribuí na e diskushon ku informashon fundamentá sientífikamente i a kompartí modelonan eksitoso pa un merkado laboral inklusivo for di inisiativanan na México, Brazil, i Ecuador. E modelonan aki a resultá na benefisio di tantu pa migrantenan, manera mas oportunidat di trabou i partisipashon den sektor formal, i tambe na redukshon den nivel di pobresa, komo pa e pais huéspet, manera un kresementu di aktividatnan ekonómiko.

Finalmente, Sra. Jeanette Bonet, CEO interino di Curaçao Investment & Export Promotion Agency (CINEX), a aserká e tema sentral for di un perspektiva empresarial. E la suprayá e desaroyo di abilidatnan empresarial i promoshon konforme e Strategia Nashonal pa Ekspòrtashon di Kòrsou (NES), ku ta enfoká riba seis pilá ekonómiko ku tin komo meta un kresementu anual di 5 porshento di e Produkto Interno Bruto (PIB) di pais. Den su presentashon e la enfatisá e importansia di kresementu ekonómiko i e ròl di e espíritu empresarial den promoshon di un merkado laboral inklusivo. Tambe Sra. Bonet a enfatisá e nesesidat di mihó kordinashon pa fomentá e espíritu empresarial.

E simposio a brindá partisipantenan e oportunidat pa hiba diskushonnan profundo ku e oradónan tokante asuntunan krusial relashoná ku un merkado laboral inklusivo na Kòrsou. Pa mas informashon riba e simposio por klèk aki.