SER ta konsehá riba introdukshon di un sistema di garantia di depósito na Kòrsou

Willemstad, 19 di yüli 2023 –Awe, djárason 19 di yüli 2023, Konseho Sosial Ekonómiko a emití su konseho riba introdukshon di un sistema di garantia di depósito na Kòrsou. E konseho aki ta riba petishon di Minister di Finansa i tin di aber ku aplikashon di artíkulo 39 di e Ordenansa Nashonal riba Supervishon di Institutonan Bankario i di Krédito pa medio di un dekreto gubernamental, konteniendo medidanan general.

Pa yega na su konseho, SER a hasi un investigashon kuidadoso i profundo, ku a inkluí revishon di literatura relevante i estudio di sistemanan similar den region i na nivel internashonal. Tambe a optené konosementu importante basá riba konsultanan ku e órgano tripartit a hiba ku diferente aktor, bou di kua e titular di finansa mes, ekspertonan di sektor bankario i di krédito, i otro ekspertonan finansiero. 

E sistema di garantia di depósito tin komo ophetivo prinsipal pa kompensá tur persona ku tin kuentanan na entidatnan di krédito (depositantenan), den kaso ku e entidat di krédito no por kumpli mas ku su obligashonnan pa ku nan. Ku esaki ta spera di por oumentá e nivel di protekshon di depositantenan i tambe stabilidat di e sistema finansiero den pais.

Na 2021 kaba a yega na konsenso riba introdukshon di e sistema di garantia di depósito entre Banko Sentral di Kòrsou i Sint Maarten (CBCS) i e organisashonnan representativo di e sektor. E sistema di garantia di depósito, manera proponé, lo inkluí normanan relativo pa struktura, supervishon, embergadura i finansiamentu di e sistema.

E sistema di garantia di depósito ta aplikabel riba tur depósito ku ta garantisá na entidatnan di krédito outorisá pa CBCS. Esaki ta inkluí entidatnan di krédito establesé na Kòrsou, filialnan di gruponan bankario, i entidatnan di krédito ku ta operá for di un sukursal na Kòrsou.

E volúmen di e sistema di garantia di depósito lo mester ta 7% di e volúmen total di depósitonan garantisá na tur entidatnan di krédito partisipante na Kòrsou. E intenshon ta pa alkansá e volúmen total aki den un término di 10 aña despues di introdukshon di e sistema di garantia di depósito. E gastunan pa mantenshon di e sistema lo ta pa e mesun entidatnan di krédito mediante un kontribushon básiko anual.

Ku introdukshon di e proyekto di e dekreto gubernamental, konteniendo medidanan general ku SER a konsehá riba dje, ta spera di yega na un sistema finansiero mas sólido i resiliente na Kòrsou, ku ta brinda mas protekshon na depositantenan.