SER ta debatí reto i perspektivanan di sistema di penshun durante konferensia

“¡Akshon dirigí awor!”

Willemstad, 27 di yüni 2023 – Durante e inougurashon di e konferensia titulá “Biba mas, traha mas!; durabilidat di e sistema di penshun den paisnan Karibense di Reino”, direktor/sekretario general di Konseho Sosial Ekonómiko (SER) drs. Raul Henriquez, a papia riba e futuro retonan i durabilidat di e sistema di penshun na Kòrsou. E konferensia di dos dia, organisá pa Fondo di Penshun General (APC) huntu ku Universidat di Kòrsou (UoC), a tuma lugá djaweps 22 i djabièrnè 23 di yüni último den oula di UoC. Entre e partisipantenan tabata tin ekspertonan riba tereno di penshun i di seguridat sosial, aktuarionan, representantenan di fondonan di penshun i di otro interesadonan di e paisnan CAS (Kòrsou, Aruba i Sint Maarten).

Henriquez a asentuá den su intervenshon e retonan demográfiko ku Kòrsou ta konfrontando, manera un envehesimentu kresiente, un de-kresementu di poblashon i un tasa di emigrashon aselerá, ku ta tradusí su mes den un oumento di “preshon gris”, e asina yamá ”grijze druk” na Hulandes. ,,Komo resultado, un grupo kresiente di persona, ku no ta traha, mester ser sostené ekonómikamente pa un grupo di persona ku sí ta traha i ku ta disminuyendo debí na e faktornan menshoná. Esaki ta trese kuné un preshon grandi riba durabilidat di e sistema di penshun.” Henriquez a indiká ku ta di krusial importansia pa desaroyá solushonnan inovativo i struktural ku mester protehá e interesnan di esnan di edat avansá i ku a la bes mester aportá na vitalidat ekonómiko di pais. E la señalá oportunidatnan pa introdusí insentivonan den e di dos pilá di e sistema di penshun i plannan di penshun komplementario. Tambe e la hala atenshon riba e problemátika di inkumplimentu ku pagonan di prima di Seguro General di Behes (AOV) ku ta menasando seriamente stabilidat finansiero di e sistema di penshun na Kòrsou.

E direktor di SER a suprayá e importansia di desishonnan den ámbito polítiko gubernamental ku mester kai a korto plaso pa atendé tantu e asuntu di durabilidat ekonómiko, komo sostenibilidat institushonal di AOV ku, entre otro, posiblemente lo kontrarestá e problema di no kumplimentu di prima manera deskribí. Tambe e la papia di e nesesidat di diferente intervenshon pa garantisá durabilidat finansiero di e sistema di penshun den su totalidat, ku foko no solamente riba e promé pilá, sino tambe riba e di dos i asta di tres pilá di penshun. Den e kuadro aki Henriquez a referí na e ahustenan normativo, proponé pa e Fundashon di Investigashon Ekonómiko Hulandes (Stichting Economisch Onderzoek, SEO) na Gobièrnu di Kòrsou ku ta inkluí, entre otro, subi edat di AOV na 2030.

E ophetivo final, asina Henriquez a suprayá, ta pa garantisá dignidat i bienestar di e poblashon ansiano di Kòrsou dor di fortalesé e sistema di penshun. Ademas e la asentuá e importansia di rekonosé e kontribushonnan balioso ku personanan di edat avansá a hasi pa komunidat i a pidi rèspèt i rekonosementu pa nan, ofresiendo nan un bida digno despues di nan penshun. Den e konteksto aki e direktor di SER a hala atenshon tambe riba e obligashon étiko i moral ku hinter komunidat tin pa kuida esnan mas vulnerabel, sigui promové koheshon sosial i sigui aportá na hustisia sosial. E la enfatisá e derecho ku kada persona tin riba un nivel básiko di seguridat ekonómiko i oportunidat di partisipá aktivamente den komunidat, independientemente de nan edat.

Mas aleu, den su diskurso, Henríquez a referí na un estudio importante ku SER di Kòrsou a realisá na 2020 riba futuro di AOV na Kòrsou. E estudio aki a destaká e papel krusial di migrashon laboral en relashon ku kambionan demográfiko i durabilidat finansiero di futuro di AOV na Kòrsou. Tambe e la hasi referensia na un konseho ku SER a emití na 2018 riba e proyekto di inisiativa di lei ku a ser presentá pa introdusí un penshun básiko obligatorio, suprayando e nesesidat di un análisis ekstenso riba e ophetivonan, implikashonnan finansiero i protekshon di trahadónan.

Por último, Henríquez a enfoká riba medidanan spesífiko pa garantisá un bida digno despues di penshun i a mustra riba e urgensia di esfuersonan konhunto pa logra un sistema di penshun sostenibel i hustu.

E teksto integral di e disertashon di sr. Henriquez ta disponibel solamente na Hulandes.