SER ta saka konseho riba proyekto di e ordenansa di kuenta di pago básiko

Willemstad, 23 di mei 2023 – Konseho Sosial Ekonómiko (SER) a emití, awe djamars 23 di mei 2023, su konseho na Minister di Finansa riba e proyekto di e ordenansa nashonal ku ta kontené normanan relativo na kuenta di pago básiko pa konsumidónan (tambe denominá komo Ordenansa Nashonal Kuenta di Pago Básiko). E konseho aki ta kontené ideanan balioso i rekomendashonnan pa futuro desaroyo di e legislashon importante aki, ku su ophetivo ta pa mehorá akseso di konsumidónan na servisionan di pago digital sigur i viabel.

E proyekto di e Ordenansa Nashonal Kuenta di Pago Básiko ta un proyekto di lei destiná pa promové inklushon finansiero i garantisá servisionan di pago pa residentenan di Kòrsou. E proyekto di lei aki ta pretendé di por garantisá un kuenta di pago aksesibel i pagabel pa tur siudadano, irespekto nan ingreso, kondishon sosial i otro sirkunstansianan personal. E konseho di SER ta resultado di un investigashon profundo riba e impakto, efikasia i viabilidat di e proyekto di lei aki. E informe ta kontené un análisis detayá di e reglamentu proponé i ta ofresé rekomendashonnan kon pa mehorá.

SER ta hasi un apelashon na tur e aktornan konserní pa tene bon kuenta ku su rekomendashonnan na ora di redaktá e legislashon final. E informe konsultivo no solamente a wòrdu entregá na e titular di Finansa sino tambe na e entidatnan gubernamental responsabel pa finalisá e proseso legislativo. Na opinion di SER ta ku satisfakshon e la konsehá riba e proyekto di lei aki, asina ei kontribuyendo i aportando na promové inklushon finansiero i garantisá servisionan di pago na un mayó kantidat di siudadano. SER ta konvensí ku e proyekto di lei aki, ku e ahustenan adekuá basá riba su konseho, lo tin un impakto positivo riba situashon sosioekonómiko di pais.