SER ta konsehá riba revishon i reparashon di leinan fiskal

Willemstad, 23 di mart 2023 – Konseho Sosial Ekonómiko (SER) a emití awe un konseho na Minister di Finansa riba e konsepto di e, asina yamá, “lei di baridó” (veegwet), ku ta proponé adaptashonnan den diferente ordenansa fiskal, bou di kua e Ordenansa General riba Impuesto, e ordenansa riba Impuesto di Ganashi 1940, e Ordenansa riba Impuesto di Entrada 1943, E Ordenansa riba impuesto di Suèldu 1976 i e Ordenansa riba Fasilidatnan fiskal pa invershonnan.

E órgano konsultivo tripartit, komponé pa representantenan empresarial, representantenan di trahadónan i ekspertonan independiente, a risibí resien di e titular di finansa e enkargo pa eksaminá e konsepto di lei i konsehá riba dje.

E modifikashonnan legislativo proponé den e konsepto di e “lei di baridó” (veegwet) ta pa saka omishonnan, koregí erornan i hasi ahustenan di un karakter tékniko den legislashon fiskal di Kòrsou. E ophetivo ta pa kumpli, entre otro, di forma adekuá ku normanan i standartnan internashonal manera establesé pa e Organisashon pa Kooperashon Ekonómiko i Desaroyo (OECD) pa asina por sigui atraé aktividatnan ekonómiko internashonal.

Un “lei di barido” normalmente ta kontené solamente ahustenan di karkter tékniko.