SER ta emití konseho riba proyekto di lei renobá pa ku sektor di azar

WILLEMSTAD, 22 di mart 2023 – Konseho Sosial Ekonómiko (SER) a entregá awe su konseho riba e proyekto di lei modifiká ku ta reglamentá weganan di azar (abreviashon: LOK 2023 ku ta para pa Landsverordening op de Kansspelen) na Minister di Finansa. LOK 2023 tin komo ophetivo prinsipal, den konteksto di kambionan sosial i teknológiko, modernisá legislashon eksistente riba organisashon di weganan di azar o ku ta duna oportunidat pa organisá e tipo di weganan aki, i enkargá un órgano independiente, ku e ekspertisio nesesario, ku aplikashon di normanan pa regulá e tipo di weganan aki i kombatí adikshon na weganan di azar i tuma medidanan di prevenshon pa evitá posibel adikshon. E outoridat nobo aki lo ta responsabel pa ehekutá LOK 2023 i e normanan ku lo ser establesé pa medio di dekretonan nashonal, ku ta kontené medidanan general, i tambe ku tareanan ku otro dekretonan asigná na dje.

Dia 28 di mei 2021, SER a konsehá kaba riba un vershon anterior di LOK i tambe riba e proyekto di lei riba impuesto riba weganan di azar (LOKS ku ta para pa Landsverordening op de Kansspelbelasting), ku a ser someté na dje pa konsiderashon na e momento ei. SER, despues di a hasi un análisis profundo i a konsiderá tur interes envolví, a konkluí rasonablemente ku ámbos proyekto di lei no a kumpli adekuadamente ku e ophetivo a base di kua nan a ser diseñá komo parti integral di un pakete di modernisashon di hinter e sektor di azar di Kòrsou, inkluso e sektor di online gaming.

E rekomendashon di e órgano konsultivo tripartit, formá pa representantenan di organisashonnan empresarial, di trahadónan i ekspertonan independiente, na e momentu ei tabata pa Gobièrnu koordiná e trayekto ku e sektor lokal ku ta brinda weganan di azar, di un forma kuidadoso, basá riba un vishon integral, i inkorporá e aporte di e sektor ei den un proyekto di lei renobá i modifiká ku aporte di konseheronan fiskal di gobièrnu i di sektor privá konhuntamente ku ekspertonan finansiero den kuadro di e pakete di modernisashon di hinter e sektor ku a ser diseña for di 2019. Ademas, SER a rekomendá un evaluashon ex ante di e implikashonnan financiero, fiskal i ekonomiko di un LOK renobá i kontinuá e trayekto di un forma diligente.

Gobièrnu a sigui e konseho di SER di 2021 i a presentá na final di aña pasá un proyekto di ley renobá den forma di e LOK 2023 na e órgano konsultivo pa emití su opinion riba dje. Awe e opinion ei a ser presentá na e titular di finansa.