Bishita introduktorio di presidente nobo di Cft

WILLEMSTAD, 21 di mart 2023 – E presidente nobo di Kolegio di Supervishon Finansiero (Cft), señora drs. Lidewijde Ongering, ku a ser nombrá dia 1 di febrüari último, a realisá djaweps dia 16 di mart último un bishita introduktorio na Konseho Sosial Ekonómiko (SER). Ei e la wòrdu risibí pa presidente den funshon na SER mr. John Jacobs i e direktor/sekretario general drs. Raúl Henríquez. Durante e interkambio introduktorio a papia riba temanan di aktualidat ku un karakter sosioekonómiko i a suprayá e importansia di finansa públiko saludabel komo base pa realisá invershonnan ku mester por kondusí na un grado mas grandi di resiliens(h)ia i desaroyo sostenibel di e isla. Señora Ongering, ku den su kargo nobo ta responsabel pa supervisá presupuesto di Kòrsou, a ekspresá su satisfakshon general pa progresonan ku ta ser realisá den e ámbito aki, ounke ku tin ainda kantidat di riesgo ku mester ser mitigá.

Riba e potrèt, di robes pa drechi: Sr. Raul Henriquez, Sr. John Jacobs, Sra. Lidewijde Ongering y Sr. Gregory Damoen (miembro di Cft, representando Pais Kòrsou).