SER ta destaká importansia di un kontrato sosial renobá na nivel di reino Ulandes

Willemstad, 23 di febrüari 2023 – “Un kontrato sosial renobá entre e paisnan di Reino Ulandes pa un rekuperashon sostenibel”. Esei tabata título di e presentashon ku a ser tené pa un delegashon di Konseho Sosial Ekonómiko (SER) di Kòrsou durante un enkuentro iberoamerikano ku a tuma lugá di 14 pa 16 di febrüari último na e siudat Antigua na e pais Guatemala. E enkuentro, ku tabata tin komo tema prinsipal ‘Demokrasia, pakto i konsenso, via pa un rekuperashon. Konsehonan Ekonómiko i Sosial komo institushonnan klave pa un gobernansa demokrátiko:” a wòrdu organisá pa e Konseho Ekonómiko i Sosial di Spaña i e agensia Spañó di Kooperashon Internashonal pa Desaroyo (AECID), den kuadro di e Plan di Transferensia, Interkambio i Trámite di Konosementu pa Desaroyo (INTERCOONECTA). E enkuentro a tuma lugá na e sentro di formashon di e kooperashon Spañó den e siudat históriko Guatemalteko.

Na e enkuentro a asistí delegadonan di órganonan konsultivo sosioekonómiko di Spaña, Guatemala, Honduras, Argentina, Costa Rica, Kòrsou, Portugal i Repúblika Dominikana i tambe delegadonan di institushonnan similar di Chile, Perú i Uruguay. E agènda a inkluí presentashonnan i diskushonnan den pènel riba temanan sosial, ekonómiko i laboral ku ta di interes pa Latino Amérika i pa paisnan di abla spañó den Karibe, na víspera di e di XXVIII Kumbre Iberoamerikano di Hefenan di Estado i di Gobièrnu ku lo tuma lugá dianan 24 i 25 di mart próksimo na kapital di Repúblika Dominikana, Santo Domingo, bou di e título “Juntos hacia una Iberoamérica justa y sostenible”.

Aunke País Kòrsou, formalmente no ta forma parti di e grupo di paisnan iberoamerikano, SER semper ta wòrdu invitá pa aktividatnan di INTERCOONECTA relashoná ku e papel klave ku konsehonan ekonómiko i sosial ta desempeñá den region riba temanan relashoná ku, entre otro, desaroyo sostenibel, demokratisashon, pas, seguridat i stabilidat. Esaki debí na e relashonnan amikal i efektivo ku SER ta mantené ku órganonan similar den region i tambe ku SER di Spaña. Konsiderando e tema prinsipal di e enkuentro na Antigua, Guatemala, SER, ku a ser representá na nivel tékniko pa su direktor/sekretario general, sr. Raúl Henríquez, e asesor prinsipal enkargá ku asuntunan internashonal, sra. Miloushka Sboui-Racamy, i e konsehero enkargá ku asuntunan inter-institushonal sra. Dainadira Eustatius-Martis, a splika, entre otro, kon durante e krísis di COVID-19 a sera de fakto un kontrato sosial renobá entre e kuater paisnan ku konhuntamente ta forma Reino Hulandes, di kua tres di nan ta situá den region Karibense. E kontrato sosial renobá aki, den forma di paketenan di pais, ta akapará un serie di medida- i reformanan pa Kòrsou den ámbito ekonómiko, finansiero, sosial i institushonal nesesario pa e isla bira mas resiliente pa e por kontrarestá posibel futuro krísisnan. Den e kuadro aki a splika mas en detaye e ròl di SER, komo órgano konsultivo tripartit, den e proseso aki.

Pa e demas presentashonnan klik akí