Studiantenan di Skol Superior di Den Haag di bishita na SER

WILLEMSTAD, 16 di yanüari 2023 – Komo parti di nan estudio superior na Haagse Hogeschool (HHS), ku un minor i/o major den Relashonnan den Reino, un grupo de 40 studiante di HHS aktualmente ta realisando un bishita di 12 dia na Kòrsou, Aruba i Boneiru, kaminda nan ta pasa vários órgano (bou di kua Konseho Sosial Ekonómiko, Representashon di Hulanda na Willemstad i Kolegio di Supervishon Finansiero), pa sera konosí mas di aserka ku e órganonan aki i pa wak tambe si nan lo kier kore un stazje na un di nan.

Aña pasá tambe un grupo di HHS a aserká i a interkambiá ku e ekipo tékniko di SER, ku a kondusí den práktika ku dos studiante a disidí di kore nan stazje na SER: Maxence Vrede i Tara Ottenheim. E biaha aki a enkargá nan dos ku e organisashon di e enkuentro ku nan koleganan di HHS.

Despues di un kuestionario introduktorio, ku a pone na prueba nivel i grado di konosementu di e studiantenan bishitante riba funshonamentu di SER – i ku a demostrá klaramente ku e studiantenan a prepará nan mes bon pa loke ta kontenido di loke SER ta hasi – Direktor/Sekretario General di SER, sr. drs. R. Henríquez, a duna un splikashon riba e ophetivonan, tareanan i e ròl di SER, su komposishon i asesoramentu di otro aktividatnan. Tambe a enfoká riba temanan di aktualidat ku SER ta atendiendo kuné i e papel ku SER ta hunga na nivel internashonal. E stazjèrnan, na nan turno a tene un presentashon na nan kompañeronan di HHS riba nan eksperensianan. Tambe nan supervisor sra. drs. Barbara Perquin, asesor mayó di SER, a splika e detayenan di posibilidatnan di kore stazje i e rekisitonan nesesario ku mester tene kuenta kuné.

E studiantenan a hasi basta pregunta i algun di nan, ya kaba a mustra interes pa kore stazje na SER.

Debí na e kantidat numeroso di bishitantenan, lamentablemente no tabata posibel organisá e enkuentro den e edifisio di SER. Konsekuentemente a hasi uso di e edifisio di Archivo Nashonal ku tabata asina amabel di pone na disposishon su ouditorio. Despues di e presentashonnan a ofresé e studiantenan un almuerso. Esaki a duna e studiantenan e oportunidat di sera konosí mas di aserka ku e bunita “Bolo di Batrei”, manera tambe ta yama e monumento aki na Scharloo.

Riba e potrèt: e grupo di studiantenan di Haagse Hogeschool, nan supervisornan i staf di SER.