SER ta konsehá riba proposishon pa bin ku regulashon mas stringente riba sektor di loteria

WILLEMSTAD, 21 di sèptèmber 2022 – Djamars, dia 20 di sèptèmber último, Konseho Sosial Ekonómiko (SER), riba petishon di Minister di Finansa, a saka un konseho riba e proposishon pa bini ku algun modifikashon den dekretonan gubernamental ku tin provishonnan pa regulá e sektor di loteria na Kòrsou i ku tin nan base den e Ordenansa riba Loteria di 1909 (P.B. 1965, no. 85).

E modifikashonnan proponé pa e Minister ta inkluí kondishonnan atministrativo adishonal ku bendedónan di number ku lisensia o titularnan di lisensia – tantu esnan eksistente komo esnan nobo – mester kumpli kuné ora nan ta solisitá o pidi pa alargá un pèrmit di loteria. Banda di esei tin e proposishon pa obligá riferonan hiba un atministrashon basá riba un sistema outomatisá. Mas aleu ta proponé pa otorgá, pa medio di mandato, outoridat di supervishon i ehekushon na e fundashon Curaçao Gaming Control Board (GCB) pa ku sektor di loteria, ya ku aktualmente GCB no tin e outoridat aki ku eksepshon di sanshoná dor di revoká un lisensia.

E pakete di ahustenan proponé tin komo ophetivo redusí e perfil di riesgo di e sektor di loteria na Kòrsou, denter di kua ta sirkulá montantenan grandi di sèn en efektivo, na un nivel aseptabel. Debí na e karakter di e sektor, ku ta unu ku ta “cash intensive”, ta konsiderá e tipo di negoshi aki komo suseptibel pa labamentu di plaka i otro práktikanan ilísito. Komo ku esaki lo ta kontra di e rekomendashonnan di e Grupo di Akshon Finansiero Internashonal (Financial Action Taskforce, FATF) pa ku labamentu di plaka i finansiamentu di terorismo (ML/TF), na kua Kòrsou komo hurisdikshon, a komprometé su mes, esaki por a kondusí na eksklushon di e sektor di loteria di servisionan bankario primario (de-banking) i na de-risking, e fenómeno kaminda bankonan koresponsal internashonal ta pone fin na relashon ku bankonan lokal i por lo tantu na prestashon di servisio na e últimonan aki.