SER ta asosiá su mes na e inisiativa di Pakto Mundial (Global Deal)

Ta nesesario reforsá Diálogo Sosial pa por enfrentá desafionan grandi

WILLEMSTAD, 11 di mei 2022 – Na inisio di luna di mei aki, Konseho Sosial Ekonómiko (SER) di Kòrsou ofisialmente a bira sosio di e Pakto Mundial (Global Deal), un inisiativa di múltiple partinan den mundu interesá den e konsepto di Diálogo Sosial i kresementu inklusivo – un asosiashon internashonal di gobièrnunan, empresanan, sindikatonan, sosiedat sivil i otro organisashonnan. Establesé pa, entre otro, Organisashon di Kooperashon i Desaroyo Ekonómiko (OECD) i Organisashon Internashonal di Trabou (ILO), e Pakto Mundial ta pretendé di konhuntamente atendé ku retonan riba merkado laboral mundial i permití ku mas tantu hende posibel ta benefisiá di globalisashon. E asosiashon ta aliniá ku Ophetivo number 17 (“Asosiashonnan pa alkansá e Ophetivonan”) di e Agènda 2030 pa desaroyo sostenibel di Nashonnan Uní (ophetivonan di desaroyo sostenibel; na Ingles: Sustainable Development Goals o SDG’s). Tambe e pakto ta un kontribushon konkreto na vários otro ophetivo di desaroyo sostenibel, spesialmente ophetivo number 8 ku ta atendé ku “trabou desente i kresementu inklusivo” i ophetivo number 10 ku ta regardá “redukshon di desigualdat denter i entre paisnan”.

Komo órgano konsultivo permanente di Gobièrnu i di Parlamento di Kòrsou, ku ta konsistí di representantenan di dunadónan di trabou, sindikatonan i ekspertonan independiente, SER ta pretendé di benefisiá máksimo di asosiashon na Global Deal, kontribuyendo asina ei na un plataforma internashonal ku ta pone balor di Diálogo Sosial sentral, meskos ku nesesidat di reforsá strukturanan di kooperashon eksistente. Pakto Mundial (Global Deal) ta ofresé SER di Kòrsou na su turno un plataforma kaminda interkambio di konosementu, eksperensia i mihó práktika por tuma lugá ku gobièrnunan i otro organisashonnan rònt mundu. Esaki ta di gran importansia pa e trabou di asesoramentu di SER.

Pa mas informashon riba e asosiashon di SER na Pakto Mundial (Global Deal) por bishitá wèpsait di Global Deal, bou di rúbrika:
News release: The Economic and Social Council of the Dutch Caribbean island of Curaçao joins the Global Deal partnership – OECD
Tambe por bishitá e wèpsait di SER mes: www.ser.cw