Interkambio di pensamentu fruktífero entre presidentenan di SER i Cft

WILLEMSTAD, 29 di yüni 2021 – Señor John Jacobs, presidente den funshon di Konseho Sosial Ekonómiko (SER), tabatin un reunion djaluna 28 di yüni 2021 ku e presidente di e Kolegio di supervishon finansiero (Cft) prof. dr. Raymond Gradus, tokante e situashon ekonómiko finansiero aktual di Kòrsou. Aki a para ketu na algun tema spesífiko riba kua SER poko tempu pasá a duna un konseho. A papia entre otro tokante proposishon pa stimulá sostenibilidat i  finansiamentu di e sistema di seguro sosial, bahamentu di edat ku trahadónan ta risibí sueldo mínimo kompleto i distribushon desigual di ingreso.

Otro miembronan di Cft tambe tabata presente na e kombersashon, señores Henk Kamp (Hulanda), Gregory Damoen (Kòrsou) i Russel Voges (Sint Maarten), e sekretario general di ámbos órganonan señores Raul Henriquez (SER) i Ray Thuis (Cft) i demas kolaboradónan di e  sekretariado di SER i Cft.