Tayer tokante partisipashon di empleado públiko dor di CAOP den koperashon ku CGOA

Willemstad, 6 di desèmber 2019 – Riba djaweps 5 di desèmber 2019, e  organisashon, Centrum Arbeidsverhoudingen Overheidspersoneel (CAOP) den koperashon ku Georganiseerd Overleg in Ambtenarenzaken (CGOA) a organisá un tayer tokante e tema partisipashon di empleadonan públiko.  E tayer dinámiko i interaktivo a wòrdu fasilitá pa Marco Sikkel i Alphons de Lange, ambos ta traha na CAOP i durante hopi aña nan tabata intensivamente enbolbí den e desaroyonan di e proyekto partisipashon di empleadonan públiko na entre otro Kòrsou.

E tayer ta un promé di e seri di reunionan planifiká tokante e tema ‘Trabou signifikativo’. Trabou ta bira entre otro mas signifikante si empleadonan por ehersé influensha riba nan ambiente di trabou, fasilidat di trabou i riba intenshonnan di tomo di desishon ku ta importante pa e organisahon. CAOP ta konektá siensia independiente ku maneho i práktika, e ta perkurá pa un repartishon di konosementu den i entre sektornan i asina’kí tin komo ophetivo kontribuí na un sosiedat kaminda hende por traha na un manera signifikante.

Na e reunion a asistí representantenan di sindikatonan di gobièrnu ku ta partisipá den CGOA, miembronan di Konseho Sosial -Ekonómiko, i vários ámtenar di diferente ministerio.

Partisipashon di ámtenarnan ta trata tokante e manera kon empleadonan ta enbolbí den maneho di e organisashon (gobièrnu) kaminda nan ta traha. Durante e reunion CAOP a dediká atenshon na e diferente formanan di partisipashon di ámtenar,  esta partisipashon direkto, indirekto i eksterno.

Ku bista riba e grupo di enfoke, esta e gobièrnu, CAOP  ta eksplorá prinsipalmente si ta eksistí un ròl establesé kaba pa partisipashon indirekto kaminda tambe por realisá un paso den direkshon di trabou signifikante. Den próksimo reunionnan lo profundisá mas riba esaki.

E presidente di CGOA, señor Prof.dr.ing. Valdemar Marcha a klousurá e enkuentro ku e palabranan ku e presentashon tabata sumamente informativo kaminda un diálogo fruktífero a kuminsá, i ku por konsiderá esaki komo un bon inisio pa promové un partisipashon di ámtenar efektivo.

E presentashon akí ta riba e wèpsait di CGAOP: https://cgoacuracao.cw/

Riba e potrèt: partisipantenan di CAOP