Presentashon ta destaká Symposio Migrashon durante konsultashon tripartit di promé -ministernan di Kòrsou, Aruba i Sint Maarten

Willemstad, 18 di yüni 2019. Durante e reunion di konsulta tripartit entre e promé minister Eugene Rhuggenaath di Kòrsou, promé minister Evelyn Wever-Croes di Aruba i promé minister Leona Marlin-Romeo di St.Maarten, un delegashon tékniko di Konseho Sosial-Ekonómiko di Kòrsou a duna un presentashon ayera riba puntonan importante di diskushon di e Simposio Migrashon. Esaki a tuma lugá riba 9 i 10 di mei 2019 na Kòrsou i a wòrdu organisá pa e SER di Aruba, SER di Kòrsou i SER di St.Maarten. Un skala grandi di ekspertonan i tópikonan a bini dilanti durante e simposio, kaminda e pregunta sentral tabata kon por optimalisá e benefisionan di migrashon i minimalisá e desbentahanan. Den òktober 2018 e promé ministernan di e tres paisnan a firma un protokòl pa sostené otro i pa traha huntu riba e tereno di maneho di migrashon relashoná ku desaroyo sosial-ekonómiko duradero. Den yüli e SER’nan ta presentá un rapòrt kohunto tokante e Simposio di Migrashon. Riba e potrėt: Mei mei promé minister Eugene Rhuggenaath di Kòrsou, promé minister Evelyn Wever-Croes di Aruba (man robes) i promé minister Leona Marlin-Romeo di Sint Maarten (man drechi) i dos konseheronan di e Ser Kòrsou.