Centrum Arbeidsverhoudingen Overheidspersoneel (CAOP) ta interkambiá di pensamentu ku Bureau SER/CGOA riba normanan tokante posishon húridiko di ámtenar

Willemstad, 20 di mei 2019-, E-meta prinsipal di e lei ku ta regla e normanan regardá ku e posishon hurídiko di e ámtenarnan, Wet Normalisering van de Rechtspositie Ambtenaren (WNRA) na Ulanda ta pa realisá bilateralidat i igualdat den relashon di trabou. Esei ta kuadra mihó ku e relashon laboral aktual i ta ofresé un mihó punto di salida pa konfiansa. Ademas, ta asumí, den todo kaso pa e momentunan akí, ku derechi sivil ta parse di ta mas apropiá pa solushoná disputanan laboral denter di e ámbito públiko. P’esei tal bes ta bale la pena pa inisia tambe diskushon riba normanan na Kòrsou ku partisipashon di partidonan enbolbí, speshalmente gobièrnu i e sindikatonan di empleadonan públiko”. Esaki e señores Marko Sikkel i Alphons de Lange di e sentro, Centrum Arbeidsverhoudingen Overheidspersoneel (CAOP), a duna komo rekomendashon durante un enkuentro di 17 di mei 2019 na e direktor/sekretario general i algun konsehero superior di e ofisina di Konseho Sosial-Ekonómiko (SER) i e organisashon di empleadonan públiko, Centraal Georganiseerd Overleg in Ambtenarenzaken (CGOA). E señores Sikkel i De Lange a indiká ku e proseso no ta nada fásil i ku na Ulanda esaki ya ta kanando pa algun añanan kaba, nan ta e dianan akí riba e isla pa un reunion di konsulta ku instanshanan di gobièrnu importante entre otro ku e kadena hudisial, inkluso wardakosta, riba temanan manera partisipashon di empleado públiko i e influensha ku sindikatonan tin riba esakí. Na mei aña pasá e señornan Sikkel i De Lage tabata na Kòrsou kaba, kaminda nan tabatin un promé enkuentro ku e representantenan di e sekretariado di SER i e CGOA. A para ketu riba e nesesidat pa duna mas kontenido na artíkulo 22, segundo párafo, di Konstitushon di Kòrsou. Konforme e párafo ei tin reglanan establesé den e Ordenansa tokante e posishon legal di esnan ku ta ehersé trabou i tokante nan protekshon, komo tambe nan partisipashon. Komo tal, e tópiko di partisipashon pa empleado públiko a wòrdu diskutí ampliamente durante e reunion di konsulta. En partikular, e tópiko partisipashon di empleado públiko a wòrdu diskutí ampliamente. Riba e tópiko konserní lo tabata bon si na sierto altura e por a haña forma e aña akí, por ehèmpel riba nivel di maneho serka gobièrnu di Kòrsou. Na mi opinion e sindikatonan no ta indispuesto”segun señor Sikkel. Durante e reunion di konsulta di e aña aki ku e ofisina di SER/CGOA a bini vários kestion dilanti, inkluso kua problema WNRA ta solushoná, kiko e ámtenar individual lo nota di WNRA, dikon a krea un Lei di ámtenar na 2017, kiko e WNRA ta nifiká pa e sindikatonan i e konsehonan di labor i kua ta e gastunan i entradanan di WRNA? , E tópiko normanan riba posishon legal di ámtenarnan ta sigur di aktualidat i interesante, pero tambe kompleho i ta rekerí tambe mas estudio. Su faktibilidat i deseabilidat mester wòrdu evaluá riba un manera responsabel den e konteksto di Kòrsou”, segun e Direktor i Sekretario General, Sr. Raul Henriquez. Despues di e enkuentro Henriquez a ekspresá su apresio pa e trabou ku  CAOP ta desplegá na Kòrsou i a indiká ku sigur e lo aseptá e invitashon di e direktor di CAOP señor Philip Geelkerken pa personalmente interkambia ideanan tokante e otro tòpiko tambe aktual ‘trabou signifikante’. Riba e potrèt di man robes bai drechi: sra. Miloushka Sboui-Racamy (mayo Konsehero/hurista), señor. Raul Henriquez (direktor/sekretario general), sr. Marko Sikkel (CAOP), sra. Sharlyn Villareal-Curial (sr. Konsehero/hurista), sr. Alphons de Lange (CAOP), sra. Sonja Boersema (mayo, Konsehero/ekonomista) en sra. Barbara Perquin (mayo, konsehero/sosioólogo no-oksidental). Klek akí pa e presentashon di PowerPoint