Delegashonnan tékniko di e Konseho Sosial-Ekonómiko (SER) di Aruba, SER Kòrsou i SER Sint Maarten ta prepará Simposio Migrashon na Aruba

Djabièrnè último 12 di aprel 2019, e delegashonnan tékniko di e Konseho Sosial-Ekonómiko di Aruba, SER Kòrsou i SER Sint Maarten a pone e último man na e preparashonnan i e programa di e Simposio Migrashon ku lo tuma lugá na Kòrsou riba 9 i 10 di mei 2019. E aporte di e oradónan internashonal i lokal ta entretanto konosí. Oradónan di e Organisashon Internashonl pa Migrashon (IOM), Instituto pa Maneho di Migrashon (MPI), UNHCR, gobièrno di Canada, Universidat di Amsterdam, Universidat di Sint Maarten, Universidat di Kòrsou, e instituto think tank Think To Do Institute, i oradónan di gobièrnunan  lokal ya a primintí ku nan lo aportá. Kombersashonnan ku algun oradó ainda ta andando pa mas tantu posibel sinkronisá e kontenido di e diferente kontribushonnan. E Save-the date- a sali siman pasá i e siman akí e invitadónan tin e oportunidat pa inskribí pa e simposio. E invitadónan ta entre otro, ministernan, parlamentarionan, desaroyadó di konsehonnan i konseheronan di vários ministerio den gobièrno, empleadonan di instansianan di ehekushon di maneho di migrashon, migrantenan, siensia, studiantenan, representantenan di doñonan di trabou i sindikatonan i trahadónan di NGOnan.  E meta di e simposio di dos dia ta pa huntu ku e stakeholdernan identifiká eskohonan riba tereno di migrashon di trabou na fabor di un desaroyo social-ekonómiko duradero na Aruba, Kòrsou i Sint Maarten. Informashon aktualisá tokante e simposio bo ta haña riba e wèpsait di SER Aruba, SER Kòrsou i SER Sint Maarten.

Despues di e enkuentro e delegashon tékniko di SER Kòrsou a kombersá ku e Protection Officer di UNHCR tokante su kontenido di su presentashon na e simposio.