Kolaborashon ta nifiká éksito: E modelo sueko multi-stakeholder pa migrantenan

Willemstad, 31 di yanüari 2019 – Manera a anunsiá anteriormente 24 i 25 di yanüari 2019 un delegashon tékniko di e SER di Kòrsou a partisipá na e Konferensia Inovashon Sosial pa Inklushon di Refugiadonan (Conferentie Social Innovation for Refugee Inclusion) na Brusela. E konferensia tabata organisá pa  European Economic and Social Committee (EESC), e Migration Policy Institute, United States Mission to the European Union (EU) i Mission of Canada to the EU. Durante e konferensia a bini hopi ehèmpelnan dilanti di strategianan nobo den Oropa, Merka i Canada ku den nan blueprint ta duna un aserkamentu mas humano, inovativo i ku enfoko riba e bario pa un inklushon sosial i ekonómiko di hende nobo i residente lokal. E embahador di Alemania na Canada, sr. Stéphane Dion, a kuminsá su lektura ku e sita ‘diversidat ta un echo, inklusividat ta un eskoho di maneho’,  kaminda el a indiká ku e maneho di migrashon i di integrashon di Canada ta funshoná tantu sosial komo ekonómiko, kaminda el a duna komo ehèmpel e siudatnan Toronto i Montreal. Pa hasi e maneho mas efektivo den futuro mester traha tambe proaktivo i huntu ku e komunidat pa desaroyá maneho di inklushon di e terser generashon di migrantenan. Tambe sr. Carlos Trindade, presidente di e EESC Group on Immigration and Integration a enfatisá ku maneho di imigrashon e integrashon mester wòrdu desaroyá huntu ku dunadó di trabou, sindikatonan i e komunidat sivil pa asina atendé ku e interesnan di e komunidat lokal komo esnan ku a yega nobo. El a referí akí na e inisiativa di konseho di EESC di desèmber 2018 tokante e gastunan di no-migrashon i no-integrashon pa Oropa. Sin imigrashon e ekonomianan di e miembro di estadonan lo haña un sla duru, e sistema di penshun lo debilitá, e sektor di salú i kuido por kai den otro i migrashon iregular lo bin ku gastunan enorme  komo konsekuensia, manera merkado di labor ilegal, eksplotashon i sklabitut modèrno, i odio kontra ekstranheronan por haña aun mas tera fértil pa krese. Di otro banda, migrashon tin hopi bentaha pa e pais, manera kresementu ekonómiko, inovashon, sera e buraku di penshun, e diversidat kultural i étniko ta enrikesé e pais, i e pais di orígen ta probechá di transferensia di sèn, ku ta impliká un montante mas grandi ku ayudo di eksterior, segun e konseho. “Si ke eksplotá e potensial di migrashon kompleto, mester bini ku un aserkamentu kaminda entre otro abilidat di e ekstranhero ta mih  utilizá. [..] ta masha importante pa krea e kondishonnan nesesario pa un integrashon eksitoso di migrantenan.”
Diferente oradó a indiká ku hopi biaha ta e hende ku ta yega nobo  mes ta integrá a ménos ku tin bareranan ekonómiko, institushonal òf polítiko, por ehèmpel riba merkado di bibienda, akseso na seguridat sosial i riba merkado laboral. Un bon práktika ta pa sera e bareranan akí, ta entre otro e uzo di e modelo sueko multi-stakeholder Entry Hub pa integrashon den merkado laboral ku ta basá riba kooperashon entre sektor privá, sindikato i dunadó di servisio di seguro sosial. Durante di e konferensia a pasa un vidio tokante e modelo akí ku un di e dunadónan di trabou, PostNord, e kompania di mas grandi di pòst di Skandinavia, kaminda den un korto tempu 25 refugiado a haña trabou i bou di ora di trabou a siña e idioma sueko. E empresa bélgiko NGO DUO for a JOB via di un programa di mèntor ta konektá imigrantenan hóben ku profeshonalnan eksperensiá  basá riba e prinsipio ku inklushon sosial i ekonómiko ta benefisiá tur dos. Diferente oradó durante diskushon den e pènel a enfatisá e importansia basá riba historia verídiko tokante migrantenan . “No mira migrantenan manera débil, pero mas bien komo hendenan ku talentonan ku ta krea oportunidat di trabou.” Akí señor Tariq Tarey, Direktor di Refugee Social Services at Jewish Family Services, Colombia, Merka, a duna un ehèmpel:  den un siudat chikitu na Ohio refugiadonan di Siria a lanta 873 empresa, ku trahadónan ku tin un istoria di migrante i ku despues di algun aña tin un entrada promedio djis un poko bou di e promedio pa kápita. No solamente e empresanan akí ta sòru pa kupo di trabou lokal, pero tambe ta kontribuí en grande na finansa di e gobièrnu lokal, i ta perkurá pa inovashon i kresementu ekonómiko. Inisiativanan riba tereno di e tal Social Impact Bonds ta bastante prometedor. Invershonistanan privá bou di e programanan akí ta prefinansiá servisio sosial pa migrantenan, variando di akomodashon te ku edukashon. Manera ku logra e metanan formulá, e proveedor di servisio ta risibí un kontribushon di gobièrnu. Ku e inisiativanan aki i otronan, den Oropa, Merka i Canada ta forma un paisahe di siudatnan chikí i grandi i komunidatnan rural ku ta yama migrantenan bonbiní, saliendo for di motibunan humanitario i ekonómiko, pero tambe pa kontrarestá un poblashon ku ta subi di edat i poblashon profeshonal ku ta krem.